दुई दशकअघि नै पप गीतहरु गाएर दर्शक तथा स्रोताको मन जित्न सफल पप गायक सञ्जय किशोर श्रेष्ठले आफ्नै एउटा पुरानो लोकप्रिय गीतको नयाँ भर्सन सार्वजनिक गरेका छन् । झण्डै १८ वर्षअघि लोकप्रिय भएको पप गीत ‘धेरै भो किन तिमी आउँदैनौ…’ लाई रि–एरेञ्ज तथा रि–रेकर्ड गर्दै गायक सञ्जय किशोरले नयाँ म्युजिक भिडियोमार्फत सार्वजनिक गरेका हुन् । शैशव किशोर श्रेष्ठ यो गीतको अडियो निर्माता हुन् । यो गीतमा संगीतकर्मी जेम्स प्रधानको शब्द तथा संगीत समावेश छ । संगीतकर्मी प्रधानकै अनुमति लिएर गायक श्रेष्ठले यो गीतलाई पुनः रेकर्ड गरेको बताईएको छ ।
नयाँ रेकर्डिङ गरिएको गीतमा तुन्नाबेल थापाको संगीत संयोजन छ । गीतमा मनिष गन्धर्वको सारंगीवादनलाई समावेश गरिएको छ । सन् २००४ मा सार्वजनिक भएको ‘बजेट २००४ः इमोशन’ एल्बममा समावेश यो गीत नयाँ एरेञ्जमेन्टसहित पुनः दर्शक तथा स्रोतामाझ आएको हो । ओएसआर म्युजिकको यूट्युबबाट सार्वजनिक हुने उक्त भिडियोलाई भूमिका देवानले निर्माण गरेकी हुन् । काठमाडौंमा छायांकन गरिएको उक्त गीतको भिडियोलाई स्थापिन निर्देशन सोनम पाख्रिनले निर्देशन गरेका छन् ।
भिडियोमा अभिनेता तथा मोडल जोर्डन राजभण्डारी तथा अभिनेत्री अञ्जली अधिकारीका साथमा राम भण्डारी, किरण कुमार शर्मा, जयराम बर्मा, ममता दाहाल, गीता थापा आदि कलाकारले अभिनय गरेका छन् । वियोगान्त कथा चित्रण गरिएको भिडियोमा अभिनेता जोर्डन राजभण्डारीले आकर्षक अभिनय गरेका छन् । उनले गम्भिर चरित्रलाई सहजताका साथ निर्वाह गरेका छन् । अभिनेत्री अञ्जली अधिकारीको अभिनयको हाउभाउ आकर्षक देखिन्छ । भिडियोमा निसल पौडेलको छायांकन, विकास दाहालको सम्पादन छ ।
