अभिनेता अनमोल केसी र अभिनेत्री सुहाना थापाको मुख्य भूमिका रहेको चलचित्र ‘ए मेरो हजुर ४’ ले एक हप्तामा चार करोड रुपैयाँ ग्रस कमाइ गरेको छ । नेपाली नयाँ वर्षको अवसर पारेर बैशाख १ गतेबाट प्रदर्शनमा आएको चलचित्र बिहीबारदेखि दोस्रो हप्तामा प्रवेश गरेको छ । प्रदर्शनको तीन दिनमा २ करोड ४३ लाख कमाएको चलचित्रले एक हप्तामा ४ करोड १ लाख ग्रस कलेक्सन गरेको छ । बिहीवार निर्माण टिमले एक पोस्टरमार्फत् चलचित्रको एक हप्ताको कलेक्सन रिपोर्ट सार्वजनिक गरेको हो ।

सुनिल कुमार थापा प्रोडक्शनको ब्यानरमा बनेको यो चलचित्रलाई झरना थापाले निर्देशन गरेकी हुन् । लभस्टोरी जनरामा बनेको ‘ए मेरो हजुर ४’ मा अनमोल र सुहाना संगै सलोन बस्नेत,सुशान्त खत्रीको पनि मुख्य भूमिका रहेको छ । चलचित्रमा बसन्त सापकोटा, आशिष अविरल, प्रतिक पौडेल, कल्याण सिंहको संगीत, संजय लामाको छायांकन, कविराज गहतराज र रामजी लामिछानेको कोरियोग्राफी, हिमाल केसीको एक्सन, मित्र डी गुरुङको सम्पादन छ ।