रामबाबु गुरुङ निर्देशित तथा निर्मित सुपरहिट चलचित्र ‘कबड्डी’ को चौथौ सिक्वेल चलचित्र ‘कबड्डी ४’को ट्रेलर सार्वजनिक भएको छ । चलचित्रको ट्रेलर दयाहाङ राई (काजी) , मिरुना मगर (मिस शान्ति) र सौगात मल्ल (बमकाजी)को वरिपरी घुमेको छ । चार मिनेट २८ सेकेन्ड लामो ट्रेलरमा माया, प्रेम र कमेडी समावेश छ ।
मणिराम पोखरेल निर्माता रहेको यो चलचित्रमा दयाहाङ, सौगात र मिरुना सँगै विजय बराल, बुद्दि तामाङ, गौमाया यात्री, पुष्कर गुरुङ, कविता आले,माओत्से गुरुङ, सारदा अधिकारी, जयनन्द लामा लगायतका कलाकारको अभिनय रहनेछ । गौमायाले यही चलचित्रबाट अभिनेत्रीको रुपमा डेब्यू गर्न लागेकी हुन् । यसपटक चलचित्रमा ‘मैयाँ’ को भूमिकामा मिरुना मगर देखिनेछिन् ।
‘द फाइनल म्याच’ उप-शिर्षक राखिएको चलचित्रलाई ‘कबड्डी’ को अन्तिम भाग भनिएको छ । ‘कबड्डी’ को पहिलो पार्टमा दयाहाङ राई, निश्चल बस्नेत र रेश्मा गुरुङ मुख्य भूमिकामा थिए । दोस्रो पार्टमा निश्चलको ठाउँमा सौगात मल्ल भित्रिए । तेस्रो पार्टमा विल्सन विक्रम राई, कर्मा र उपासना सिंह ठकुरी जोडिएका थिए । अब फाइनल म्याचमा ‘कबड्डी’ को कथामा जोडिएका सबै प्रमुख पात्रहरु दोहोरिने निर्माण टिमले बताएको छ ।
बासुुरी फिल्मस्को ब्यानरमा निर्माण भएको यो चलचित्रमा मणीराम पोखरेल, अर्जुन कार्की, ओमचन्द्र रौनियारको लगानी रहेको छ । चलचित्रमा निमेश श्रेष्ठको सम्पादन, शैलेन्द्र डी कार्कीको छायांकन, कालिप्रसाद बाँस्कोटाको संगीत रहेको छ । जेठ १३ गतेबाट प्रदर्शनमा आउने तयारीमा रहेको चलचित्रको कथा निर्देशक गरुङले लेखक उपेन्द्र सुब्बासँग मिलेर तयार पारेका हुन् ।
