अभिनेता खगेन्द्र लामिछानेको डेब्यु निर्देशन रहने चलचित्र ‘पानीफोटो’ को मोसन पोस्टर सार्वजनिक गरिएको छ । मोसन पोस्टरमा चलचित्रका मुख्य कलाकार खगेन्द्र, मेनुका प्रधान, अनुप बराल र मलिका महत फिचर्ड छन् । चलचित्र आगामी साउन १३ गतेबाट देशभर प्रदर्शन हुनेछ ।
मोसन पोस्टर सार्वजनिक गर्दै खगेन्द्रले चलचित्र निर्देशन गर्नुको कारणबारे भिडियो सन्देशमा भनेका छन्, ‘मेरो एउटा सपना थियो कमसेकम एउटा फिल्म निर्देशन गर्ने । धेरैले सोध्नुभयो कलाकार र लेखक हुँदा हुँदै किन फिल्म निर्देशन गर्नुपर्यो भनेर । सपनाको कुनै उत्तर हुँदैन । त्यसैले मैले ‘पानीफोटो’ निर्देशन गरेँ ।’
स्वयम् खगेन्द्रले आफु लिखित नाटकलाई चलचित्रको स्वरुप दिएका हुन् । उनले चलचित्रमा माओवादी जनयुद्धको समयमा झन्डै डेढ दशक अगाडी बेपत्ता भएको छोराको पर्खाइमा बसेको बा-आमाको कथालाई दर्शक माँझ लिएर आउन लागेका हुन् । यो दशक अगाडि गुरुकुलमा मञ्चन भएको चर्चित नाटक ‘पानीफोटो’ कै अनुरुपण गरिएको चलचित्र हो । चलचित्रमा खगेन्द्रसंगै सुनिल पोखरेल, अनुप बराल, मेनुका प्रधान, प्रकाश घिमिरे, माओत्से गुरुङ, बुद्धि तामाङ्ग, कमलमणि नेपाल, अशान्त शर्मा, मलिका महत, प्रकाश घिमिरे, राधा श्रेष्ठ,अजस्र ढुङ्गाना, कमल देवकोटा, अनोज पाण्डे, अनिल पाण्डे, नवराज गिरी, श्यामकुमार खड्का लगायतका कलाकारको अभिनय रहेको छ ।
चलचित्रको छायांकन काठमान्डौसँगै वर्दिया , रोल्पा र स्याङ्गजामा गरिएको छ । दीपक बज्राचार्यको छायांकन रहेको चलचित्रमा निमेष श्रेष्ठसँगै अर्जुन कार्कीको सम्पादन रहेको छ । यसमा पुष्पा संगमको पाश्र्व संगीत रहेको छ । ‘पशुपति प्रसाद’ र ‘धनपति’ जस्ता खाँट्टी नेपाली स्वाद बोकेका सफल चलचित्र निर्माण गरेको टुकी आर्ट्सले यसफिल्म निर्माणमा मन्जुश्री फिल्म्ससंग सहकार्य गरेको छ ।चलचित्रमा लेखन पनि खगेन्द्रकै रहेको छ भने यसमा चिफ एडीको रुपमा अनिल खड्का रहेका छन् । चलचित्रलाई रोजिना सिटौला र रविन्द्र बज्राचार्यले संयुक्त रुपमा निर्माण गरेका हुन् ।
