चलचित्र ‘द सेक्रेट अफ राधा’ को प्रदर्शन मिति परिवर्तन भएको छ । २४ भदौदेखि सार्वजनिक प्रदर्शनमा आउने तयारीमा रहेको यो चलचित्र अब भदौ १०मा आउने भएको छ । निर्माण युनिटले चलचित्रको एउटा नयाँ पोस्टर सार्वजनिक गर्दै प्रदर्शन मिति परिवर्तन भएको जानकारी दिएको हो । पोस्टरमा राधाको भूमिकामा रहेकी अभिनेत्री सृष्टि श्रेष्ठ सानी बच्चीसँग देखिएकी छिन् ।
सुवर्ण थापाको निर्देशन रहेको चलचित्रमा सौगात मल्लको समेत लगानी रहेको छ । ‘सुनगाभा’, ‘फन्को’ र ‘बाटोमुनिको फूल २’ निर्देशन गरेका सुवर्ण थापाको यो चौथो चलचित्र हो । चलचित्रमा सृष्टिसँगै सौगात मल्ल, खगेन्द्र लामिछाने, राजन खतिवडा, मेनुका प्रधान, बुद्धि तामाङ आदि कलाकारको अभिनय रहेको छ । चलचित्रमा दयाहाङ राई अतिथि भूमिकामा देखिनेछन् । काठमाडौं र चित्लाङका विभिन्न रमणीय स्थानमा छायांकन गरिएको चलचित्रको छायांकन २५ दिनमा सकिएको थियो । चलचित्रका छायांकार नरेन्द्र मैनाली हुन् ।
