ज्ञानेन्द्र देउजाको निर्देशनमा बनेको चलचित्र ‘झिँगेदाउ’को पहिलो गीत ‘आगोबिना बिंडी जल्दैन’ सार्वजनिक भएको छ । मंगलबार राजधानीमा पत्रकार सम्मेलन आयोजना गरेर गीत सार्वजनिक गरिएको हो ।
गीतमा चलचित्रका मुख्य कलाकार केकी अधिकारी, आँचल शर्मा, मुकुन भुसाल र कुशल विष्ट फिचर्ड छन् । अर्जुन पोखरेलको संगीत रहेको गीतमा शान्तिश्री परियार र प्रवीण बेडवालको स्वर समावेश छ । गीतमा मुकुन र केकी तथा कुशल र आँचलको जोडी बाँधिएको छ ।
गीतको भिडियोमा रामजी लामिछानेको कोरियोग्राफी रहेको छ । ललितपुरको शिरकाली चौरमा छायांकन गरिएको गीतमा १५ लाख बढि खर्च भएको थियो। आगामी भदौ १७ गतेबाट प्रदर्शनमा आउने चलचित्रमा केकी र आँचलले पहिलो पटक एकसाथ काम गरेका हुन् ।
कपनगडी सिनेमा र फिल्म क्रियु नेपालको ब्यानरमा निर्माण भएको चलचित्र भिमनिधि तिवारीको कथा ‘झिँगेदाउ’मा आधारित रहेको छ । प्रदीप भारद्वाजको पटकथा तथा सम्वाद लेखेको चलचित्रमा अर्जुन पोखरेलको संगीत, बिष्णु घिमिरेको छायांकन, मित्र डि गुरुङको सम्पादन छ । चलचित्रमा सुलभ, समिक्षा र सुशिल निर्माताको रुपमा रहेका छन् ।
