नाम नै ब्रान्ड बनिसकेको बक्स अफिसमा हिट मानिएको सिरिज चलचित्र ‘नाई नभन्नु ल’को छैटौँ सिरिज पनि बन्ने भएको छ । निर्देशक तथा लेखक विकासराज आचार्यले यसबारे जानकारी दिएका हुन् । वैशाखको दोस्रो साताबाट छायांकन सुरु हुने चलचित्रमा सलोन बस्नेत, बाल–कलाकार अनुभव रेग्मी र सेड्रिना शर्मा पक्का भैसकेको आचार्यले बताएका छन् । उनी थप्छन्, चलचित्रमा ३ नायिका र एक नायक हुने छन् जसमा एक नयाँ अनुहार भित्रिने छ । नायक पनि नयाँ अनुहार नै राख्ने तयारी उनको छ ।
चलचित्रमा दोस्रो पटक अनुभव रेग्मी र सेड्रिना शर्माको जोडी बाँधिएको छ । यसअघि उनीहरुले यही चलचित्रको पाँचौ श्रृंखलामा सँगै काम गरेका थिए । अनुभव भने चलचित्र ‘नाईं नभन्नू ल’ को दोस्रो श्रृंखलाबाट छुटेका छैनन् ।
अहिले चलचित्रको स्क्रिप्ट र सङ्गीतमा काम भइरहेको आचार्यले बताएका छन् । चलचित्रको कथा निर्देशक आचार्य र सामिप्यराज तिमल्सिनाले मिलेर लेखिरहेका छन् ।यस अघि विकासले ‘नाई नभन्नु ल ५’ बनाएपछि ‘हजार जुनी सम्म’ नाममा चलचित्र बनाएका थिए जसलाई दर्शकको खासै साथ मिलेन ।
