अभिनेता दयाहाङ राई र अभिनेत्री प्रकृति श्रेष्ठ अभिनीत चलचित्र ‘बिहे पास’को फर्स्टलुक पोस्टर सार्वजनिक भएको छ । बिहीबार सरस्वती पूजाको अवसर पारेर पोस्टर सार्वजनिक गर्दै बैशाख १ गतेलाई प्रदर्शन मिति पनि घोषणा गरिएको हो । दुईवटा फर्स्टलुक पोस्टरमध्ये एउटामा दया र प्रकृति माला लगाएर नवविवाहित दुलहा-दुलहीको रुपमा चित्रित छन् भने अर्को पोस्टरमा उनीहरुसँगै रविन्द्र झा, बुद्धि तामाङ, शिशिर बाङ्गदेल फिचर्ड छन् ।
विवाहको कथामाथि बनेको चलचित्रमा दयाहाङ र प्रकृतिले पहिलो पटक एकसाथ काम गरेका हुन् । आगामी नयाँ वर्ष (बैशाख १ गते) दयाहाङको नै मुख्य भूमिका रहेको चलचित्र ‘जारी’ पनि प्रदर्शन हुँदै छ । एउटै मितिमा दयाहाङको दुई चलचित्र एकआपसमा भिड्ने छ । यसअघि बैशाख १ मा ‘भगवत् गीता’, ‘नाईं नभन्नू ल ६’, ‘प्रसाद २’ पनि प्रदर्शन हुने तय भइसकेको छ ।
प्रवेश पौडेल निर्देशित चलचित्रमा श्याम राई, विहाल पहारी, सुवास गजुरेल, हिउँवाला गौतम, रुषा न्यौपाने, प्रकाश भुजेल, नविन शेरचनको पनि अभिनय छ । आरआर फिल्म प्रोडक्सनको ब्यानरमा निर्माण भएको चलचित्रमा रोहित कट्टेल प्रस्तुतकर्ता र रत्न श्रेष्ठ कार्यकारी निर्माता छन् । उनीहरु चलचित्रका वितरक समेत हुन् ।
रोजन श्रेष्ठ निर्माता रहेको चलचित्रको सह-निर्मातामा ग्याल्जेन लामा र बालकृष्ण पाख्रिन छन् । मित्र देव गुरुङको सम्पादन, डिबी खनालको गीत रचना, प्रवेश मलिकको संगीत, मर्रे केर, अकाश बराल, साजन काफ्लेको कथा, बराल र काफ्लेको पटकथा तथा संवाद रहेको चलचित्रको छायाँकार शिव ढकाल हुन् ।
