आगामी वैशाख १ गते प्रदर्शन हुने चलचित्र ‘जारी’को आधिकारिक टिजर सार्वजनिक भएको छ । जारीप्रथाको कथावस्तुमा आधारित चलचित्रको प्रमुख भूमिकामा दयाहाङ राई र मिरुना मगरकोअभिनय छ ।
मंगलवार युट्युबमा सार्वजनिक गरिएको टिजरमा एक लिम्बु दाम्पतीको कथा भनिएको छ ।
फिल्ममा दयाहाङ राई र मिरुना मगर दाम्पतीको भूमिकामा छन् । उनीरुबीचको प्रेम र घरायसी झगडालाई टिजरमा देखाइएको छ । त्यस्तै, टिजरको मध्य भागतिर दयाहाङलाई रेखा लिम्बुको प्रेममा डुबेको देख्न सकिन्छ भने अन्तिममा मिरुना मगर र रोयदीप श्रेष्ठबीचको प्रेमलाई व्यक्त गरिएको छ । जसले गर्दा टिजर सस्पेन्सयुक्त छ । टिजरको पृष्ठभूमिमा सुनिने ‘पालाम’ निकै सुन्दर छ ।
रामबाबु गुरुङको निर्माणमा बनेको चलचित्र ‘जारी’लाई उपेन्द्र सुब्बाले लेखन तथा निर्देशन गरेका हुन् । उपेन्द्रले ‘कबड्डी’ सिरिज लेखनमा रामबाबुलाई साथ दिँदै आएका थिए । उनले, यही चलचित्रबाट निर्देशनमा डेब्यू समेत गरेका हुन् । चलचित्रमा दयाहाङ र मिरुनासहित प्रेम सुब्बा, विजय बराल, रेखा लिम्बू, रोयदीप श्रेष्ठ, कमलमणि नेपाल, पुष्कर गुरुङको समेत अभिनय छ । चलचित्रको पाँचथरका रमणीय स्थानमा छायांकन भएको हो ।
