गत शुक्रबारबाट नेपाली पर्दामा प्रदर्शनरत चलचित्र ‘बुलाकी’ दक्षिण एशिया भित्र प्रतिष्ठित मानिने श्रीलंकाको सिनेमा महोत्सव ‘जाफना इन्टरनेशनल चलचित्र फेस्टिभल २०२४’मा छनोट भएको छ । उक्त फेस्टिभल अन्तर्गतको उत्कृष्ट डेब्यू चलचित्र प्रतिस्पर्धाको लागि यो चलचित्र छनोट भएको हो ।जाफना सिनेमा फेस्टिभलको दशौं संस्करण आगामी सेप्टेम्बरमा हुँदैछ । ‘बुलाकी’ प्रतिस्पर्धामा छनोट भएको उक्त अवार्ड गत बर्ष नेपाली चलचित्र ‘दि रेड सुटकेस’ले जितेको थियो । चलचित्र निर्माता तथा अभिनेता विराज बिष्टले सामाजिक सञ्जालमा पोस्ट सार्वजनिक गर्दै खुशी व्यक्त गरेका छन् ।
‘तन, मन, धन र ज्यान बाजी लगाएर गरिएको कामले कहिँ न कहिँ सार्थकता पाउने रैछ, श्रीलंकाको प्रतिष्ठित चलचित्र महोत्सव मा ‘बुलाकी’ छनोट भएको खुशी साट्न पाउँदा हर्षित छु, बिष्टले लेखेका छन्, ‘हाल नेपाली सिनेमा घरमा प्रदर्शनरत हाम्रो फिल्म अर्को हप्ताबाट अन्तर्राष्ट्रिय प्रदर्शनी थालनीको तयारीमा रहेको समेत जानकारी गराउन चाहन्छु ।’नेपाल सरकारबाट विशेष फिल्मको अवार्डबाट पुरस्कृत यो चलचित्रले यसअघि नै देश तथा विदेशका विभिन्न प्रतिष्ठित अवार्ड समारोहहरूमा बाजी मारिसकेको छ । चलचित्र हेर्ने समिक्षक तथा दर्शकबाट ‘बुलाकी’लाई उत्कृष्ट प्रतिक्रिया प्राप्त भइरहेको छ । दोस्रो पटक प्रदर्शनमा आएको चलचित्रले शुक्रबारबाट दोस्रो हप्ताको प्रदर्शनीको थालनी गर्दैछ ।
पश्चिम नेपालको कर्णाली र सुदूर पश्चिम भेगको सामाजिक कथा उठान गरेको चलचित्रलाई लक्ष्मण सुनारले निर्देशन गरेका हुन् । यो चलचित्रले बिष्टसँगै सुरक्षा पन्त, नरेन खड्का, सरस्वती खत्री, लक्ष्मी गिरी, सुशील पोखरेल, रमेश बुढाथोकी लगायत प्रमुख अभिनयमा छन् ।
