दीवाकर भट्टराईको लेखन र निर्देशनमा तयार भएको चलचित्र ‘मायावी’ को गीत ‘सितारा जडेको’ सार्वजनिक भएको छ। यो गीतमा दीक्षित पौडेल र समीरा थपलियाको स्वर, शम्भुजित बास्कोटाको संगीत, तथा दयाराम पाण्डे र दीवाकर भट्टराईको शब्द रहेको छ। गीतले विवाहका क्रममा माइतीघर छोडेर पराइघर जाँदा भावुक बनेकी युवतीको विदाइको पललाई गहिरो रुपमा प्रस्तुत गरेको छ। विवाहको वातावरणलाई झल्काउने यो गीत दर्शकलाई मन छुने खालको छ।
गीतको भिडियोमा चलचित्रका मुख्य कलाकार पल शाह, दीपिका प्रसाईं, र नव-कलाकार समीम खानको भूमिका देख्न सकिन्छ। भिडियोमा दीपिकाको समीमसँग विवाह भइरहेको दृश्यमा पल भावुक देखिएका छन् भने दीपिकाले पललाई हेर्दै गरेका क्षणहरुले उनीहरुको प्रेम वियोगको संकेत गर्दछ। यसले कथावस्तुको प्रेम त्रिकोणलाई झल्काउँछ। भिडियोमा प्रशान्त ताम्राकार, सुशील सिटौला, र करिश्मा श्रेष्ठको पनि आकर्षक अभिनय देख्न सकिन्छ।
आगामी फागुन १४ गते प्रदर्शनमा आउन लागेको ‘मायावी’ मा लक्ष्मी गिरी, राजाराम पौडेल, अन्शु महर्जन, रवि डंगोल लगायतका कलाकारहरुको अभिनय रहेको छ। चलचित्रको निर्माणमा ध्रुव न्यौपाने, राज कटुवाल, र चन्द्र पन्तले लगानी गरेका छन्। प्रवीण भट्टराई र करण सिंह कार्यकारी निर्माता हुन् भने सह-निर्माताको रुपमा मञ्जु भण्डारी, राजु पराजुली, र सुमित ओली रहेका छन्। चलचित्रको गीत संगीतमा शम्भुजित बास्कोटासँगै एसडी योगीले पनि योगदान दिएका छन्। ट्रेलरको सम्पादन शाहिल खानले गरेका हुन् भने छायांकन राजु विक्रम थापाको रहेको छ।
