नायिका अदिती वुढाथोकी र नायक धिरज मगरको मुख्य भूमिका रहेको चलचित्र ‘बाबरी’को छायांकन फेरि सुरु भएको छ । बिहीवारबाट चलचित्रको दोस्रो चरणको छायांकन सुरु भएको छ । काठमाडौंमा गीतको छायांकन गर्दै चलचित्रको रोकिएको काम सुरु गरिएको निर्माणपक्षले बताएको छ ।
निषेधाज्ञा अगाडि गत बैशाखमा पूर्वको लेटाङमा शुभमुहूर्त गर्दै ‘बाबरी’ को छायांकन सुरु भएको थियो र करिब २ साता यो चलचित्रको छायांकन पूर्वका रमणीय स्थानमा भयो । तर, कोरोना महामारीको दोस्रो लहर बढेपछि छायांकन पोस्टपोन्ड गरियो ।
गीतको छायांकन सकिएपछि चलचित्रको बाँकी छायांकन भारतको दार्जिलिङमा गरिने छ। भाइटीकाको भोलीपल्ट (कात्तिक २१ गते) निर्माण टिम दार्जिलिङ जानेछ । चलचित्रको छायांकन अधुरैमा रोकिएपछि मुम्बई गएकी अभिनेत्री अदिती बुढाथोकी दशैंअघि नेपाल आएकी थिइन् ।
‘बाबरी’ मा नेपाली चलचित्रकी पुरानी अभिनेत्री तृप्ती नाडकरका छोरा धिरज टोटलानीको पनि मुख्य भूमिका रहेको छ । नेपालमा उनको भागको छायांकन पूरा भइसकेको छ । अब उनी बाँकी छायांकनका लागि मुम्बईबाट सिधै दार्जिलिङ जानेछन् । चलचित्रमा तृप्तीको पनि अभिनय रहने बताइएको छ । चलचित्रलाई यस वर्षको अन्तिम (नयाँ वर्ष) मा प्रदर्शन गर्ने निर्माण टिमको तयारी रहेको छ ।
बाबरी फिल्मस्को ब्यानरमा निर्माण रहने लागेको चलचित्रलाई सुरेन्द्र पौडेलले निर्देशन गर्दै छन् । यसअघि चलचित्र ‘आभास र कृ’ निर्देशन गरिसकेका सुरेन्द्रको दोश्रो पटक अदितिसँग सहकार्य हुन लागेको हो। चलचित्रमा नरेन्द्र मैनालीको छायांकन, एन्जिला खत्रीको कोरियोग्राफी, कालीप्रसाद बाँस्कोटा, अनमोल गुरुङ र सुजन चापागाईंको संगीत रहेको छ ।
यो चलचित्रमा अदितिको जोडी धिरजसँग बाँधिएको छ । पहिला यो चलचित्रमा अभिनेत्री अदिती बुढाथोकीको अपोजिटमा गायक नितेशजंग कुँवर अनुबन्धित भएका थिए । तर, उनले पारिवारिक कारण देखाउँदै चलचित्र छाडेपछि धिरज मगर भित्रिएका हुन् ।
नायक धिरज मगरले चलचित्र ‘आई एम ट्वान्टी वान’को छायांकन सकेपछि यो चलचित्रको काम सुरु गरेका हुन् । नायिका अदिती वुढाथोकीले भने चलचित्र ‘कृ’पछि यो चलचित्रमा काम गर्न लागेकी हुन् ।
