कर्मा र भोला राज सापकोटा अभिनित चलचित्र षट्कोणको टिजर सार्वजनिक गरिएको छ । साइकोलोजिक थ्रिलर जनरामा निर्माण भएको चलचित्रको टिजरले दर्शकमा कौतुहलता जगाउन सफल हुने देखिन्छ । सार्वजनिक टिजरमा कर्मा एक मर्डर मिस्ट्रीको खोजीमा लागेको पत्रकारको भुमिकामा देखिएका छन् । चलचित्रलाई मिलन डि काप्रिले निर्देशक गरेका हुन् । यो उनको डेव्यु निर्देशन रहेको चलचित्र हो । सार्वजनिक टिजरबाट उनले निर्देशनमा राम्रो सम्भावना देखाएका छन् ।
क्लेमेन्टाइन प्रोडक्सन र ट्राभलर्स क्रिउ फिल्मस्को ब्यानरमा निर्माण भएको चलचित्र आगामी बैशाख २३ गतेबाट नेपाल भरका सिनेमा घरमा प्रदर्शन हुनेछ । कोरोना महामारी अगाडी नै निर्माण भएको चलचित्रको सम्पुर्ण काम सकेर प्रदर्शनको पालो कुरेर बसेकाले अहिले समय उत्तम लागेकाले प्रदर्शनको लागि तयार भएको निर्माण टिमको भनाई छ । चलचित्रमा कर्मा र भोलाराज सापकोटाका अलवा लोकेन्द्र लेखक, सुयशा अधिकारी, विराज कडरिया, शिशिर लिम्बु वानेमको अभिनय रहेको छ । शिशिर लिम्बु वानेमको कथा तथा पटकथा रहेको चलचित्रको संवाद महेश दवाडीले लेखेका हुन् ।
चलचित्रमा आङ्छेन लामाको छायांकन, सागर खनाल र निर्देशक मिलन डि काप्रिले सम्पादन छ । क्लेमेन्टाइन प्रोडक्सनको युट्युब च्यानलबाट टिजर रिलिज गरिएको चलचित्रलाई वितरण जिम्मा आरआर फिल्मस्ले लिएको छ ।
