हरर थ्रिलर चलचित्र ‘चि मुसी चि: इभन डेड डिजायर बिलोङ्गिङ’को ट्रेलर रिलिज गरिएको छ । २ मिनेट ५२ सेकेण्ड लामो ट्रेलरले एक अदृश्य शक्तिसंग बच्न पात्रहरुले गर्नु परेको संघर्ष देखाएको छ । एक अपरिचित बालिका: जसको वरिपरि ट्रेलरले चक्कर कटाउछ । उक्त बालिकाले अन्य पात्रहरुलाई दु:ख दिएपनि त्यस पछाडीको कारण सस्पेन्स राखिएको छ ।
मिर्ना जेम्स र यश सैनी निर्देशित चलचित्रले दर्शकमा डर र कौतुहलता जगाउन सफल हुन्छ । अन्तिममा ऋचा शर्माले बोल्ने संवाद,‘छोराको चाहमा सानो बच्चालाई बली दिइयो’ले रहस्यको ढोका खोल्ने प्रयास गरेको छ । मिर्ना र यश कै कथा/पटकथा रहेको चलचित्रमा ऋचासंगै प्रियंका कार्की, बेनिशा हमाल, आयुषमान देशराज जोशी, रविन्द्र झा, राजन खतिवडा, गौरव विष्ट, अरुण चक्रवर्तीलगायतका कलाकारहरुको अभिनय छ ।
सार्वजनिक ट्रेलरले दर्शकमा कौतुहलता पैदा गर्नेमा निर्माण पक्ष आशावादी देखिएको छ । प्राय: नेपालमा निर्माण हुने हरर चलचित्र भन्दा ‘चि मुसी चि’ भिन्न रहेको निर्माण पक्षले बताएको छ । पुष २२ देखि अल नेपाल प्रदर्शनमा आउने चलचित्रमा सुशन प्रजापतिको छायांकन र यश सैनीको सम्पादन रहेको छ । एमी स्टुडियोको व्यानरमा अरुण चक्रवर्तीको प्रस्तुति रहेको चलचित्रमा रिञ्जु केसीसंगै अरुण चक्रवर्तीले लगानी गरेका छन् ।
