हास्य कलाकार कुन्जना घिमिरे ‘सुन्तली’ को निर्देशन रहेको वेब सिरिज ‘मै राम्री’ आगामी बिहीबार (पुस २८) देखि प्रसारण हुने भएको छ । सामाजिक विषयवस्तुमा आधारित वेब सिरिज ‘धुर्मुस सुन्तली’ युट्युब च्यानलबाट प्रत्येक बिहीबार साँझ पौने सात बजे प्रिमियर हुनेछ ।
सामाजिक विषयवस्तुमा निर्माण भएको सिरिजमा विशेष गरी बालबालिका र युवापुस्ताहरुको जीवनमा आउने उतारचढावको कथा प्रस्तुत गरिएको छ । सिरिजको केही भाग छायांकन भइसकेको छ भने अन्य भागको तयारी भइरहेको छ । सिरिजको सम्पादन मित्र गुरुङले गरेका छन् ।
शुबिहानी फिल्म्सको ब्यानरमा निर्माण भएको सिरिजमा रामबाबु रेग्मी, गीता अधिकारी, दिनेश काफ्ले, सन्तोष बानियाँ, रेखा लिम्बू, शहिना भट्टराई, समिसन जिसी, प्रसन्न कार्की, आशिका बस्नेत, प्रमिला राई र मिलन राईको अभिनय छ ।
