मिलन चाम्सको निर्देशनमा तयार भएको फिल्म ‘वर एन्ड वधु’को पहिलो गीत सार्वजनिक गरिएको छ । आइतबार राजधानीमा एक कार्यक्रमका बीच ‘तिमी सँग’ बोलको रोमान्टिक भावको गीतमा फिल्मकी अभिनेत्री आँचल शर्मा र नव-अभिनेता विवेक कर्माचार्य प्रस्तुत छन् । गीतले उनीहरुको एकअर्काप्रति प्रेम र आशक्ति दर्शाउँछ । यो गीत रोमानियाको सुन्दर ठाउँमा खिचिएको छ।
अञ्जु पन्त र प्रताप दासको गायन रहेको गीतमा लेखु सहयात्रीको शब्द रचना छ भने अर्जुन पोखरेलको संगीत छ ।
आगामी भदौ १४ गतेदेखि प्रदर्शनमा आउने तयारीमा रहेको फिल्ममा आँचल र विवेकसहित विजय लामा, किरण केसी, हिउँवाला गौतम, सरिता लामिछाने, अन्सु महर्जन, दिनेश काफ्ले, यमन श्रेष्ठ, सृष्टि खड्का, गरिमा शर्मा, रविन्द्र खड्का, कुसुम शर्मा, विजु पार्की, हिमेश पन्त लगायतको पनि अभिनय छ । आँचल लाई यो गीतमा बोल्ड देखिएको छ । विवेकसँग केमेस्ट्री पनि जमेको छ ।
विवेकले यही फिल्मबाट डेब्यु गरेका हुन् भने मोडल कुसुमको पनि यो डेब्यु हो ।फिल्ममा जानुका थापा निर्माता र डा. अमित रिजाल कार्यकारी निर्मातामा छन् । एलआरके प्रोडक्शनको ब्यानरमा बनेको फिल्ममा सुदिप बरालको छायांकन एवं प्रदीप भारद्वाजको लेखन छ । फिल्मले सामाजिक कथावस्तुलाई रमाइलो शैलीमा भन्ने जनाइएको छ । २ वर्षअघि रोमानियामा छायांकन गरेपछि यो फिल्म रोकिएको थियो । गत बैशाखमा काठमाडौंमा बाँकी छायांकन गरिएको हो ।
