दशैँको फूलपातीको दिन अर्थात यही असोज २४ गतेदेखि प्रदर्शनमा आउन तयार चलचित्र ‘छक्का पञ्जा–५’ को नयाँ गीत बुधवार सार्वजनिक गरिएको छ । ‘ब्रेकअप सङ’ शीर्षक राखेर तयार पारिएको यो गीतमा गायक बाबुल गिरीको स्वर, संगीत तथा शब्द सुन्न सकिन्छ । चलचित्रकी निर्देशक तथा गीतमा फिचर गरिएकी अभिनेत्री दिपाश्री निरौलाको पनि स्वर सुन्न सकिन्छ । गीतको भिडियोको केन्द्रमा निर्देशक निरौला नै छिन् । उनलाई केदार घिमिरे, मेक्सम गौडेल, सुरविर पण्डित, रामेश्वर केसीको साथमा दीपकराज गिरी, केदार घिमिरे तथा वर्षा सिवाकोटीले साथ दिएका छन् ।यो गीतको कोरियोग्राफी गम्भीर बिष्टले गरेका छन् ।
दीपाश्री निरौलाको निर्देशनमा तयार भएको चलचित्रमा आर्यन सिग्देल, निर्मल शर्मा, तेज गिरीलगायतको पनि अभिनय छ । हरि हुमागाईंको डिओपी तथा उत्तम हुमागाईंको छायांकन रहेको चलचित्रमा दीपकराज स्वयंको पटकथा लेखन छ भने कथा र संवादमा उनलाई केदार घिमिरे र दीलिप तामाङले सघाउनुभएको छ । चलचित्रमा रोशन श्रेष्ठको द्वन्द्व निर्देशन तथा विपिन मल्लको सम्पादन छ ।
गीतमार्फत सामाजिक व्यंग्यमात्रै गरिएको छैन समाजमा भैरहेका माया–प्रेमका विकृतीहरुलाई पनि व्यंग्य गरिएको छ । ‘छक्का पञ्जा’को अघिल्ला चार सिरिज ब्लकबस्टर भएको यो चलचित्रले पनि उत्तै व्यापार गर्ने देखिएको छ।
