अभिनेत्री सुरक्षा पन्तको मुख्य भूमिका रहेको चलचित्र ‘बुलाकी’को फर्स्टलुक सार्वजनिक भएको छ । मंगलवार अन्तर्राष्ट्रिय नारी दिवसको अवसर पारेर सार्वजनिक गरिएको फर्स्टलुक पोस्टरमा सुरक्षा फिचर्ड छिन् । उनले शिर पछ्यौलीले ढाकेकी छन् र नाकमा बुलाकी लगाएर भिन्न लुक्समा प्रस्तुत छिन् ।
जारी प्रथामाथि आधारित भएर निर्माण भएको चलचित्रको मुल कथा नै सुरक्षाको वरीपरी घुम्नेछ। चलचित्रमा उनले दुर्गम गाउँको अति विपन्न एक महिलाको भूमिका निर्वाहा गरेकी छन् । चलचित्रमा कर्णाली प्रदेशको जनजीवन, रीतिरिवाज र संस्कृतिलाई प्राथमिकताका साथ प्रस्तुत गरिएको छ । लक्ष्मण सुनारको निर्देशन रहेको चलचित्र डोल्पा, जाजरकोट र रुकुमका विभिन्न स्थानमा खिचिएको हो ।
यो चलचित्रमा सुरक्षासँगै नरेन खड्का,बिराज बिष्ट, प्रकाश कँडेल, रमेश बुढाथोकी, सरस्वती खत्री, सुशील पोखरेल, लक्ष्मी गिरी, कुलदीप अधिकारी, झलनाथ खत्री, उपासना वाइबा, सोनु सेढाईं, धनबहादुर राई, कमल गाउँले, अमित परियार लगायतका कलाकारको अभिनय छ । शिव ढकालले खिचेको चलचित्रको गीतमा श्रीकृष्ण बल मल्लको संगीत र शिव परीयार/प्रविशा अधिकारीको गायन रहनेछ । छत्रेश्वरी म्यानेजमेन्ट प्रालिको ब्यानरमा स्वर्गीय मोती बिष्टको प्रस्तुति र गोपाल बिष्ट निर्माता रहेको यो चलचित्रको सह-निर्मातामा भने प्रकाश कँडेल (सौगात) छन् ।
रसुवा लगायतका क्षेत्रमा तामाङ समुदायका महिलाले पुनर्विवाह गर्न चाहेमा उनीहरुको पहिलो श्रीमानलाई जारी बापतको रकम तिर्नुपर्ने सामाजिक नियम अझै पनि रहँदै आएको छ । अर्थात् महिलाहरु किनबेच हुने गरेका छन् । चलचित्रले यही विषयलाई उठान गर्न लागेको हो ।
