अभिनेता प्रदीप खड्काको मुख्य भूमिका रहेको चलचित्र ‘प्रकाश’ को फर्स्टलूक पोस्टर सार्वजनिक भएको छ । निर्माण टिमले प्रदीपको जन्मदिनको अवसर पारेर विहिबार पोस्टरमा सार्वजनिक गरेको हो । पोस्टरमा प्रदीप खड्का र दिया मास्के मात्र फिचर्ड छन् । पोस्टरमा प्रदीप र दीया मास्के भिन्न लुक्समा प्रस्तुत छन् । फर्स्टलुक पोस्टर सार्वजनिक गर्दै निर्माण टिमले प्रदर्शन मिति पनि घोषणा गरेको छ । चलचित्र आउँदो भदौ १० गते प्रदर्शन हुने छ। चलचित्रमा प्रदीपले पहिलो पटक गाउँले युवकको भूमिका निर्वाह गरेका छन् ।
दिनेश राउतको निर्देशनमा बनेको चलचित्रमा प्रदीप र दियाको साथमा रेनु योगीको मुख्य भूमिका रहेको छ । रेनुले यही चलचित्रबाट अभिनेत्रीको रुपमा डेब्यू गर्न लागेकी हुन् । चलचित्रमा प्रकाश घिमिरे, राजन खतिवडा, रामबाबु रेग्मी, निरज पन्थी, हुम विसी, प्रशान्त श्रेष्ठ, गोविन्द सुनवार, दीपेन्द्र शाही लगायतका कलाकारहरूको पनि अभिनय रहेको छ ।
बिनिष इन्टरटेन्मेन्टको ब्यानरमा निर्माण भएको चलचित्रमा महेन्द्र अधिकारीको लगानी छ । राजेश श्रेष्ठले छायाङ्कन गरेको चलचित्रलाई जीवन थापाले सम्पादन गरेका छन् । चलचित्रमा तारा प्रकाश लिम्बु, एलिस कार्की, दीपक शर्माको सङ्गीत रहेको छ। चलचित्रको छायाङ्कन जुम्लामा गरिएको हो । निम्न वर्गीय परिवारमा हुर्किएको एक युवकले सरकारी स्कूलको शिक्षक बन्न गर्ने संघर्षको कथामा चलचित्र आधारित छ ।
