अभिनेत्री ऋचा शर्मा स्टारर चलचित्र ‘कौसीद’ले अफिसियल पोस्टर सार्वजनिक गर्दै प्रदर्शन मिति घोषणा गरेको छ । सोमबार सार्वजनिक पोस्टरमा आगामी जेठ २७ (जुन १०) लाई प्रदर्शन मिति तोकिएको छ । हालसम्म उक्त मितिमा प्रदर्शन तोकेको यो पहिलो नेपाली चलचित्र हो ।
‘कौसीद’ पोस्टरमा अभिनेत्री शर्मा पैसालाई अंगाल्दै देखिन्छिन् । वित्तिय ऋणको प्रभावमा परेको परिवारको कथा बोल्ने चलचित्रको केन्द्रीय द्वन्द्व पैसाकै वरिपरी घुमेको पोस्टरले भान दिन्छ । कुमार भास्करको निर्देशनमा बनेको चलचित्रमा ऋचासँगै भोलाराज सापकोटा, रुपेश दाहाल, परिक्षित विक्रम राणा, सदिक्षा गौतम, निर्भिक भट्टराई र सागर भट्टराई मुख्य भुमिकामा छन् । केदार भुसालको निर्माणमा तयार भएको यो चलचित्रको कार्यकारी निर्मातामा दिमेश श्रेष्ठ तथा सह-निर्मातामा लक्ष्मण बानियाँ रहेका छन् ।
चलचित्रको कथा लेखन नव विजय प्रकाश श्रेष्ठ र धिर्जन थपलियाले गरेका छन् । निसाल पौडेलले छायांकन गरेको चलचित्रमा मित्र डि. गुरुङ र भिम विश्वकर्माको सम्पादन रहेको छ । बड पिक्चर्सको ब्यानरमा चलचित्र ‘कौसीद’ निर्माण भएको हो । गत वर्ष २०२२ को अवसरमा निर्माण घोषणा गरिएको यो चलचित्रको कोरोना महामारीको बीच निर्माण सम्पन्न भएको थियो । हाल पोष्ट प्रोडक्सनको काम सम्पन्न भइ चलचित्र प्रदर्शनको लागि तयार भएको हो । आर आर फिल्मस् ले चलचित्रको वितरण अधिकार लिएको छ ।
