२०१८ को सुपरहित चलचित्र केजीएफको दोस्रो भाग ‘केजीएफ च्याप्टर २’को ट्रेलर सार्वजनिक भएको छ । निर्माण पक्षले आइतबार यो चलचित्रको धमाकेदार ट्रेलर सार्वजनिक गरेको हो । दक्षिण भारतीय अभिनेता यश स्टारर बहुप्रतीक्षित ‘केजीएफ च्याप्टर २’ आगामी अप्रिल १४ अर्थात् वैशाख १ गते प्रदर्शन हुँदैछ ।
चलचित्रको २ मिनेट ५७ सेकेन्डलामो ट्रेलरमा यश, सञ्जय दत्त र रविना टण्डनको अभिनय र डाइलग निकै दमदार छ । त्यस्तै, ट्रेलरमा श्रीनिधि शेट्टी, प्रकाश राज र मालविका अविनाशलाई पनि देखाइएको छ ।
कन्नड, तेलुगु, हिन्दी, तमिल र मलयालम भाषामा निर्माण भएको केजीएफ २ ले पहिलो भागमा यशको रकीको हातबाट खलनायक गरुडको मृत्युपछि हुने घटनाहरूलाई पछ्याउँछ। अब केजीएफ मा संघर्ष गरिरहेका मानिसहरूलाई मद्दत गर्ने रकीले आफ्नो सबैभन्दा ठूलो शत्रु अधीराको सामना गर्नुपर्नेछ।
प्रशान्त नीलद्वारा लिखित तथा निर्देशित चलचित्र भारतमा ६ हजार स्क्रिनमा प्रदर्शन हुनेछ । होम्बले फिल्म्सको ब्यानरमा विजय किरागन्दूरले निर्माण गरेको चलचित्रलाई उत्तर भारतीय बजारमा रितेश सिधवानी र फरहान अख्तरको एक्सेल इन्टरटेनमेन्ट र एए फिल्म्सले प्रस्तुत गरेको छ ।
