चलचित्र ‘षट्कोण’को प्रदर्शन मिति घोषणा भएको छ । निर्माण कम्पनी क्लेमेन्टाइन प्रोडक्सनले मंगलबार पोस्टर सार्वजनिक गर्दै आगामी वैशाख २३ गतेलाई चलचित्रको प्रदर्शन मिति तय गरेको हो । सार्वजनिक पोस्टरमा अभिनेता कर्मालाई मात्र देखाइएको छ।
कर्मा शाक्य र भोलाराज सापकोटाको मुख्य भूमिका रहेको चलचित्रमा लोकेन्द्र लेखक, सुयशा अधिकारी र शिशिर लिम्बु वानेमको पनि अभिनय छ । साइकोलोजिकल थ्रिलर विधामा बनेको चलचित्रमा कर्माले एउटा हत्याको घटनालाई खोजी गर्ने पत्रकारको भूमिका निर्वाह गरेका छन् ।
मिलन डी काप्रीको निर्देशन र विराज कडरियाको निर्माण रहेको चलचित्रमा महेश दवाडीको संवाद, आङ्छेन लामाको छायांकन छ । सागर खनाल र मिलन डी काप्रीले सम्पादनमा सहकार्य गरेका छन् । आरआर फिल्म्सले देशव्यापी वितरण गर्ने ‘षट्कोण’ को छायांकन काठमाडौं र मकवानपुरको भीमफेदीमा भएको हो ।
