२०७८ सालको फागुन १३ गते नेपालमा प्रदर्शन भएको सुपरहित चलचित्र ‘म यस्तो गीत गाउँछु २’ आगामी मे महिना अर्थात् जेठदेखि विदेशमा प्रदर्शन हुने भएको छ । सुदर्शन थापाको निर्माण तथा निर्देशनमा तयार भएको चलचित्रको अन्तर्राष्ट्रिय वितरणको जिम्मा नेपसिने कम्पनीले लिएको छ ।
पूजा शर्मा र पल शाहको मुख्य भूमिका रहेको चलचित्रको अमेरिका र क्यानडासँगै बेलायत, अष्ट्रेलिया र हङकङको लागि पनि प्रदर्शन हुने जनाइएको छ । चलचित्रलाई उत्तर अमेरिकामा नेपसिने र बेलायतमा मिफरुङ यु र युके मगर एसोसिएसनले प्रदर्शन जिम्मा लिएको छ । अष्ट्रेलियामा नेपाली टचले प्रदर्शन जिम्मा लिएको छ । उत्तर अमेरिकासहितका मुलुकमा कम्पनीले लागत बाँडफाँडको मोडलमा वितरण अधिकार लिएको हो ।
सांगीतिक प्रेम कथामा तयार भएको चलचित्र ‘म यस्तो गीत गाउँछु २’ मा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारहरुको अभिनय छ ।
