चर्चित अभिनेत्री सुरक्षा पन्त फ्रान्समा हुने संसारको प्रतिष्ठित ‘कान्स फिल्म फेस्टिभल २०२२’ मा सहभागी हुने भएकी छन्। उनी आजै पेरिसतर्फ प्रस्थान गर्न लागेकी हुन् । आफू अभिनित चलचित्र ‘द एट माउन्टेन्स’को प्रिमियरमा भाग लिन उनी फेस्टिभलमा सहभागी हुँदै छिन् । मे १७ (आज) देखि सुरु भएर २८ तारिखमा सकिने फेस्टिभलमा आफू सहभागी हुन लागेको जानकारी सुरक्षाले सामाजिक सञ्जालमार्फत् दिएकी हुन् । चलचित्रको केही अंश नेपालको मनाङमा छायांकन गरिएको छ भने चलचित्रको प्रिमियर जेठ ४ गते कान्समा हुनेछ ।
उनले फेसबुकमा लेखेकी छन्, ‘केही समयअघि एउटा अन्तर्राष्ट्रिय सिनेमामा एउटा पात्रको रुपमा काम गर्ने मौका जुरेको थियो । ‘द एट माउन्टेन्स’, जसको केही अंश नेपालको मनाङमा छायांकन गरिएको थियो । उक्त सिनेमा कान्स फिल्म फेस्टिभलको मुख्य प्रतिस्पर्धामा छानिएको खबर पाएसँगै निमन्त्रणा आयो अनि मैले जाने तय गरेँ । सिनेमाको कान्समा प्रिमियर जेठ ४ गते हुनेछ । मसंग तितो मिठो अनुभव छ जुन कुनै दिन हजुरहरु माझ सुनाउँला, भोलि जाँदै छु। उताको यात्राको पनि मसंग बहुमुल्य अनुभव हुनेछन्। ’
