रामबाबु गुरुङ निर्देशित तथा निर्मित सुपरहिट चलचित्र ‘कबड्डी’ को चौथौ सिक्वेल चलचित्र ‘कबड्डी ४’ यही शुक्रबार प्रदर्शन हुँदै छ। सोमवारबाट मल्टीप्लेक्सहरुमा खोलिएको एड्भान्स बुकिङमा चलचित्रको टिकट आक्रामक विक्री भइरहेको छ ।‘द फाइनल म्याच’ उप-शिर्षक राखिएको चलचित्रलाई ‘कबड्डी’ को अन्तिम भाग भनिएको छ । त्यसैले पनि चलचित्रप्रति दर्शकको ठूलो क्रेज देखिएको छ । चलचित्रले प्रदर्शन अगावै ओभरसिज राइट्सबाट लगानी उठाइसकेको छ ।
चलचित्र प्रदर्शन हुन एक साताभन्दा कम बाँकी रहँदा चलचित्रको टिम देश दौडाहा निस्किएको थियो । दमक र इटहरीपछि नारायणगढ पुगेको कबड्डी टोलीले बुटवल, पोखरा र काठमाडौंमा भव्य कन्सर्ट गरेर देश दौडाहा सफलरुपमा सम्पन्न गरेको थियो । चलचित्रको हिस्सा नभएपनि कलाकारहरु विल्सनविक्रम राई र गौरव पहारी पनि प्रचारमा छन् । विल्सन तेस्रो सिक्वेलमा चाहिँ थिए ।
चलचित्रमा दयाहाङ राई, सौगात मल्ल, मिरुना मगर, बुद्धि तामाङ, विजय बराल, गौमाया यात्री, पुष्कर गुरुङ, कमलमणी नेपाल, कविता आले, जयनन्द लामा, प्रकाश घिमिरेलगायतको अभिनय रहेको छ । चलचित्रको कथा निर्देशक गरुङ र उपेन्द्र सुब्बाले लेखेका हुन् ।
हेर्नुहोस् तस्विरमा ‘कबड्डी ४’को टिम!:
तस्वीर : भद्र बहादुर कार्की/कोरिबाटी
