वि.सं २०६३ सालमा निर्माण भएको ‘आँधी तुफान’को सिक्वल ‘आँधी तुफान २’को गीत सार्वजनिक भएको छ । आगामी साउन २० गतेबाट प्रदर्शनमा आउने चलचित्रको शिर्ष गीत (ओएसटी) मा सुरेश अधिकारीको संगीत, हरी उप्रेतीको शब्द रचना र सुवानी मोक्तानको स्वर रहेको छ । गोवामा खिचिएको गीतको भिडियोमा तीन अभिनेत्रीहरु आरती आचार्य, याङ्शु श्रेष्ठ र सोनी बिसी बोल्ड बिकिनीअवतारमा प्रस्तुत छन् । भिडियोका कोरियोग्राफर अभि वाग्ले हुन् ।

ओम साई भक्त मुभि प्रालीको ब्यानरमा निर्माण भएको चलचित्रमा मौनता श्रेष्ठको कथासँगै पटकथा तथा संवाद, रामशरण उप्रतीको छायांकन, कमल राई र अभि वाग्लेको कोरियोग्राफी, सुरेश अधिकारी र विक्रम थापाको संगीत, हरी उप्रती र दीपेन्द्र खड्काको गीत रचना, प्रेम चुल्ठेको द्धन्द्व निर्देशन, सुवानी मोक्तान, विनुसा राई र अर्चन लिम्बुको स्वर र मन्दिल श्रेष्ठको सम्पादन रहेको छ । आरआर फिल्मस्ले वितरण गर्ने ‘आँधी तुफान २’मा सुनयमान श्रेष्ठको डविङ तथा मिक्सिङ, सुन्दर श्रेष्ठको पोस्टर डिजाइन, रवी केसीको मेकअप, सम्राट थापाको पाश्र्व संगीत, मुख्य सहायक निर्देशक जीवन गौतम रहेका छन् ।