सात वर्षअघि निर्माण भएको हेमराज बीसी निर्देशित चलचित्र ‘जेरी’को दोस्रो श्रृंखला बन्ने भएको छ। ‘जेरी २’मा अभिनेता अनमोल केसी अनुबन्धित भएका छन् ।
आइतबार काठमाडौंको मेरियट होटलमा निर्माता र अनमोलबीच लिखित सहमति भएको छ । चलचित्रलाई हेमराज बीसीले नै निर्देशन गर्ने भएका छन् भने निर्मातामा सरोज न्यौपाने र रामकृष्ण श्रेष्ठ छन् ।
लभस्टोरी जनरामा निर्माण हुने फिल्मको स्क्रिप्ट हेमराजकै हो । फिल्म ‘होस्टेल’बाट हेमराजले निर्देशन र अनमोलले अभिनेताको रुपमा डेब्यू गरेका थिए । पहिलो सहकार्य नै फलिफाप भएपछि उनीहरुबीच ‘जेरी’ र ‘गाजलु’मा पनि सहकार्य भयो । यसपछि भने हेमराजले अफर गरेका फिल्महरु अनमोलले अस्वीकार गर्दै आएका थिए । अन्ततः एकपटक फेरि हिट जोडीको सहकार्य भएको छ ।
