चलचित्र सम्बन्धि अध्ययन गराउँदै आएको कान्तिपुर फिल्म एकेडेमीले पहिलो पटक निर्माण गरेको चलचित्र ‘म’को ट्रेलर सार्वजनिक भएको छ । बिहीवार राजधानीमा एक कार्यक्रमका बीच सार्वजनिक गरिएको चलचित्रको ट्रेलरमा सस्पेन्स र थ्रीलर भरिएको छ ।
चलचित्रको २ मिनेट १९ सेकेन्डको ट्रेलरमा नव-अभिनेता संजोग रसाइलीलाई मुख्य स्थानमा राखिएको छ । उनको वरपर चलचित्रको कथा घुमेको छ। एक आपराधिक घटना र अनुसन्धानमा जुटेका विभिन्न पात्रको कथा भन्ने चलचित्रको ट्रेलर विरामीको रुपमा अस्पताल पसेको एक पात्रको अपराधिक योजनाको वरपर घुमेको छ ।
चलचित्र ‘सुनगाभा’ का निर्देशक सुर्वण थापाले ‘म’ को निर्देशन गरेका हुन् । चलचित्रमा निशा अधिकारी चिकित्सक, रुविना थापा नर्स, नीराजन प्रधान प्रहरी अधिकृत, नरेन खड्का ग्याङस्टर भूमिकामा प्रस्तुत छन् । चलचित्रमा अभिनेता सरोज खनाल पनि मुख्य भूमिकामा छन् । यो चलचित्र आगामी साउन २० गते प्रदर्शन हुँदैछ । चलचित्रको कथा कान्तिपुर फिल्म एकेडेमीका सिइओ समेत रहेका प्रकाश पुरीले लेखेका हुन् । तेञ्जिङ्ग पाल्देनको छायांकन रहेको यो चलचित्रले मानिसभित्रको कथा भन्ने बताइएको छ ।
