नेपालमा बनेको पहिलो चलचित्र ‘आमा’को नाम सापटी लिएर निर्माण गरिएको दीपेन्द्र के. खनाल निर्देशित चलचित्र ‘आमा’ को राजधानीमा एक कार्यक्रमको आयोजना गर्दै ट्रेलर सार्वजनिक गरिएको छ । खनाल यो चलचित्रका लेखक तथा छायाँकार समेत हुन् ।
आमाको महत्व र मायालाई दर्साइएको चलचित्रको ट्रेलर भावनात्मक छ । चलचित्रमा आमाको भूमिकामा मिथिला शर्मा छिन । ट्रेलर हेर्दा चलचित्रको मूल कथा पिताको वरिपरि घुमेको लाग्छ । तर, चलचित्रको टाइटलझैं कथा पनि आमामै केन्द्रित रहेको निर्देशक दीपेन्द्र के. खनाल बताउँछन् ।
चलचित्रकी अर्की लिड कलाकार सुरक्षा पन्त हुन् । फस्टलुक पोस्टरमा देखिएको उनको भिन्न लुक्स जसमा उनको कपालको आधा भाग कोटिएको थियो,दर्शकलाई निकै चकित बनाएको थियो । सुरक्षा र मिथिलाका अलावा चलचित्रमा देशभक्त खनाल, सरिता गिरी, लक्ष्मी भुषाल, टीका पहारीलगायतका कलाकारहरुको मुख्य भूमिका रहेको छ ।
चलचित्रलाई निर्देशक खनाल आफैले खिचेका हुन् । आमा बुवाको लागी छोराले निभाउने कर्तव्य छोरीले पनि उसैगरी निभाउनु पर्ने सन्देश ट्रेलरले दिएको छ । चलचित्रको छायांकन काठमाण्डौ र रामेछापमा भएको हो । चलचित्र फागुन ९ (महाशिवरात्री) मा प्रदर्शन हुँदैछ ।
