सुवर्ण थापा निर्देशित चलचित्र ‘द सिक्रेट अफ राधा’को ट्रेलर सार्वजनिक भएको छ । आइतवार यूट्युबमार्फत् सार्वजनिक भएको ट्रेलरमा अभिनेत्री सृष्टि श्रेष्ठलाई केन्द्रमा राखिएको छ । गर्भवती श्रीमती (सृष्टि) ले आफ्नो बेपत्ता श्रीमान खोजी गर्ने क्रममा आउने उतार-चढावको कथालाई ट्रेलरमा देखाइएको छ । आगामी भदौ १० गतेबाट प्रदर्शनको तयारीमा रहेको चलचित्रको ट्रेलरमा सृष्टिले राधाको चरित्रलाई न्याय गरेको भान हुन्छ।
‘द सिक्रेट अफ राधा’लाई अभिनेता सौगात मल्लसँग मिलेर निर्देशक थापाले निर्माण गरेका हुन् । चलचित्रमा सृष्टिका अलावा सौगात मल्ल, खगेन्द्र लामिछाने, मेनुका प्रधान, पशुपति राई, दिव्य देव पन्त, राजन खतिवडा, लोकेन्द्र लेखक, दयाहाङ राई, निश्चल बस्नेत, बुद्धि तामाङ लगायतका कलाकारको अभिनय रहेको छ । ‘राधा’ आमाको सम्झनामा निर्माण गरेको निर्देशक थापाले बताएका छन् । चलचित्रमा रंगकर्मी सुनिल पोखरेल पनि अतिथि भुमिकामा देखिने छन् ।
आदियोगी भिजन, महारानी इन्टरटेन्मेन्ट युके, मन्डला अनलाइन र एएमआइ फिल्मस्को प्रस्तुती र मन प्रोडक्सनको एसोसिएनमा निर्माण र बिरजना इन्टरटेनमेन्ट तथा बिक्रमदास जोशी सह-निर्माता रहेको चलचित्रमा सुवर्ण थापाको कथा, नरेन्द्र मैनालीको छायांकन, निमेश श्रेष्ठको सम्पादन र कालीप्रसाद बाँस्कोटाको संगीत छ ।
