कलाकार दीपकराज गिरी र दीपाश्री निरौलाले अन्ततः चलचित्र ‘छक्का पञ्जा ४’ निर्माण गर्ने भएका छन् । सोमवार भक्तपुरको सूर्यविनायक मन्दिरमा शुभमुहूर्त गर्दै चलचित्र को छायांकन सुरु गरिएको छ।
‘छक्का पञ्जा’को अघिल्ला तीन सिरिजलाई दीपाश्री निरौलाले निर्देशन गरेकी थिइन् तर छक्का पञ्जा ४ भने हेमराज विसीले निर्देशन गर्ने छन् । नरेन्द्र मैनालीको छायांकन रहने चलचित्रको कार्यकारी निर्मातामा केदार प्रसाद घिमिरे र निर्मल शर्मा छन् ।
आमा सरस्वती मुभिजको ब्यानरमा निर्माण हुने चलचित्रमा दीपकराज गिरी, दीपाश्री निरौला, केदार घिमिरे, बेनिशा हमाल, निर्मल शर्मा, नीर शाह, मलिना जोशी, राज आचार्य लगायतको अभिनय रहनेछ । चलचित्रमा बेनिशा र मलिना दीपकराजको जोडीको रुपमा रहने बताइएको छ । घामद शेरेको निर्देशनपछि मौन बसेका निर्देशक बिसी र दीपकदिपा टोलीको सहकार्य नेपाली चलचित्र क्षेत्रमा चर्चाको विषय हो । निर्देशक बिसी र दीपकराज -दिपाश्री टिमले पहिलो पटक सहकार्य गर्न लागेका हुन् ।
