चलचित्र विकास बोर्डको अध्यक्ष नियुक्त भएका अभिनेता भुवन केसीलाई उनका सुपुत्र अभिनेता अनमोल केसी पनि सामाजिक संजाल मार्फत बधाई तथा शुभकामना व्यक्त गरेका छन् । अनमोलले सामाजिक सञ्जालमा पितासँगको बाल्यकालको तस्विर पोस्ट गर्दै नेपाली शुभकामना दिएका हुन् । शुभकामनामा उनले पिताको कार्यकालमा फिल्मको श्री वृद्धिमा हुने विश्वास समेत ब्यक्त गरेका छन् ।
उनले लेखेका छन, ‘बाटो हिँड्ने मान्छे भन्दा पनि बाटो बनाइदिने मान्छे महान हुन्छन् । म तपाईंलगायत तपाईंका समकालीन हस्तीहरुकै पाईलाहरु पछ्याउँदै यहाँसम्म आइपुगेको छु । आजबाट तपाईंको भूमिका झन् गहन बनेको छ । नेपाली सिनेमाको श्रीवृद्धिमा तपाईंको थप योगदान रहने कुरामा म ढुक्क छु । यो गौरवशाली अवसर प्राप्त गर्नु भएकोमा धेरै धेरै बधाई तथा शुभकामना बाबा । मेरो मार्गदर्शक, मेरो प्रेरणा ।’
केसीलाई सोमबारको मन्त्रिपरिषद् बैठकले चलचित्र विकास बोर्डको अध्यक्षमा नियुक्त गरेको हो । आज बिहान बोर्डको कार्यालय पुगेर केसीले पदभार ग्रहण गरेका छन्।
