मिलन चाम्स निर्देशित चलचित्र ‘वर एण्ड वधु’को अहिले युरोपेली मुलुक रोमानियामा छायांकन भइरहेको छ । यसैबीच, निर्माणपक्षले चलचित्र छायांकनको केही तस्बिर सार्वजनिक गरेको छ । सार्वजनिक तस्विरहरुमा चलचित्रका मुख्य कलाकार अभिनेत्री आँचल शर्मा र डेव्यु अभिनेता विवेक कर्माचार्य रोमान्टिक देखिएका छन् । चलचित्रको अझै केही दिन रोमानियामै छायांकन हुनेछ ।
‘वर एन्ड वधु’को टिमले त्यहाँको राष्ट्रिय टेलिभिजनमा अन्तर्वार्तासमेत दिएका छन् । साथै, टेलिभिजनमा चलचित्रको छायांकनको रिपोर्ट पनि प्रसारण गरिएको थियो । चलचित्रमा किरण केसी, बुद्धि तामाङ, हिमेश पन्त, साम्राज्ञी आरएल शाह, विजय लामा लगायतको पनि अभिनय रहने छ ।
कमेडी र प्रेमकथामा आधारित रहने चलचित्रमा आँचल ‘बधु’को भूमिकामा देखिने छिन् भने विवेक ‘वर’को। एल आर के इन्टरटेन्मेन्टको ब्यानरमा निर्माण हुने चलचित्रको प्रदर्शन मिति भने तय गरिएको छैन । प्रद्धीप भारद्धाजको कथा, पटकथा तथा संवाद लेखन रहेको चलचित्रमा सुदिप बरालको छायांकन रहेको छ ।
