‘रियल कपल’ सौगात मल्ल र सृष्टि श्रेष्ठको प्रमुख भूमिका रहेको चलचित्र ‘माइकल अधिकारी’को पहिलो गीत सार्वजनिक भएको छ । ‘छुक छुक रेल गाडी’ बोलको रोमान्टिक गीतमा प्रकाश दास र अस्मिता अधिकारीको युगल स्वर रहेको छ । भने शैलेश कँडेल क्षेत्रीको शब्द रचना र रेवन सिंहको संगीत छ । गीतको भिडियोमा सौगात र सृष्टि फिचर्ड छन् । कमल राईको कोरियोग्राफीमा तयार भएको गीतको भिडियोमा सौगात र सृष्टिको नृत्य रहेको छ, उनीहरु खुशी मुद्रामा प्रस्तुत छन् ।
चलचित्र आगामी भदौ ३ मा प्रदर्शन हुने छ । सेरोगेसीको कथामा आधारित भएर निर्माण भएको चलचित्रमा सौगात र सृष्टिसँगै अशान्त शर्मा, एनी कुँवर, हेमन्त बुढाथोकी, बिद्या कार्की, सुजना ढकाल, दिलिप बोहरा, बिट्रिनी कलाकार जमाइका टोम्ससहित झापाको चर्चित नाट्य समुह परिवर्तन थियटरका कलाकारको अभिनय रहेको छ ।
रञ्जित रौनियारले निर्देशन गर्ने चलचित्रलाई गोपीकृष्ण मुभिजले निर्माण गरेको हो । चलचित्रलाई काठमाडौंभित्र करणको कम्पनी जिजिए ग्रुप र मोफसलमा श्रीकृष्ण फिल्मस् र पाथिभरा फिल्मसले वितरण गर्दैछ । चलचित्रका प्रस्तुतकर्ता उद्धव पौडेल र निर्माता निरक पौडेल हुन् । चलचित्रमा राजुविक्रम थापाको छायाङ्कन, निर्देशक रन्जित रौनियारको कथा, शैलेश कंडेल क्षेत्रीको पटकथा तथा संवाद, शम्भुजित बाँस्कोटा र निलेश सिंहको संगीत, कविराज गहतराज र रामजी लामिछानेको कोरियोग्राफी रहेको छ ।
