सुरेन्द्र पौडेल निर्देशित चलचित्र ‘बाबरी’को ट्रेलर सार्वजनिक भएको छ । सोमबार काठमाडौंमा आयोजित पत्रकार सम्मेलनमा ट्रेलर सार्वजनिक गरिएको हो। ट्रेलरमा चलचित्रका मुख्य कलाकारहरु धीरज मगर, अदिती बुढाथोकी र धीरज नाड्कर फिचर्ड छन्। धिरज मगर र धिरज नाडकर दुवै अदितीको प्रेममा छन् र ट्रेलरमा माया पाउन दुई धिरजबीच हुने लडाइँ पनि देखाइएको छ ।
चलचित्र आगामी असोज १४ (बडा दशैं) मा देशभर प्रदर्शन हुने छ । यसअघि चलचित्र आगामी भदौ ३१ गतेबाट प्रदर्शनमा आउने तयारीमा थियो । त्रिकोणात्मक प्रेमकथामा आधारित चलचित्रमा बादल भट्ट, कमणमणी नेपाल, उर्मिला बस्नेत, ध्रुव कोइराला, सुनिता श्रेष्ठ, नितेश गुरुङ, त्रिशला तामाङ, दीलिप गुरुङलगायतका कलाकारहरुको पनि अभिनय छ ।
निर्देशक पौडेलको कथा र सम्पादन रहेको चलचित्रमा कालीप्रसाद बाँस्कोटा/सुजन चापागाईं/अनमोल गुरुङको संगीत, नरेन्द्र मैनालीको छायांकन र एञ्जिला खत्री/विक्रम लामाको कोरियोग्राफी छ । बाबरी फिल्म्सको व्यानरमा निर्मित चलचित्रमा गणेश बुढाथोकी र पुष्पालता बुढाथोकी निर्माता रहेका छन् । भने सुष्मा गुरुङले सहनिर्माताको भूमिका निभाएकी छन् । चलचित्र काठमाडौं, झापा, मोरङ र सिक्किममा खिचिएको हो ।
