आगामी कार्तिक २५ गतेबाट प्रदर्शनमा आउने तयारीमा रहेको चलचित्र ‘चोर र पुलिस’को ट्रेलर सार्वजनिक भएको छ । बिहीवार एक कार्यक्रमका बीच सार्वजनिक गरिएको २ मिनेट ४७ सेकेन्डको ट्रेलरमा सामान चोर्ने चोरलाई पुलिसदेखि गुण्डासम्मले खोजिरहेको देखाइएको छ ।

घरायसी चोरी र प्रहरीले चोरलाई समात्न गरेको कारबाहीमाथि चलचित्रको कथा घुमेको छ। रोमान्स, ड्रामा र एक्सनले भरिएको ट्रेलरमा बुद्धिले प्रहरी अधिकृतको भूमिका निर्वाह गरेका छन् र एक्सन गरिरहेका छन् भने शोभित खलपात्रको भूमिकामा छन्।

चलचित्रमा धिरेन शाक्य, राजेन्द्र खड्की, जयनन्द लामा, जयकिसन बस्नेत, रबि गिरी, शोभित बस्नेत, रामचन्द्र अधिकारी, सुरवीर पण्डित, जाहान्वी बस्नेत, कविता राय, सुलेमान शंकर इकु, अर्जुन गुरुङ, सुभाष गजुरेल, शारदा गिरी, रश्मी भट्ट, रेशम फिरिरी, मदन ताम्राकार, आरएल लामा लगायतको पनि अभिनय छ ।

आरएल लामा मोक्तान निर्देशित यस चलचित्रको निर्माता आर सोनम मोक्तान र लंकामाया मोक्तान, कार्यकारी निर्माता जीवन लामा, सह-निर्माता करणबहादुर विष्ट र प्रस्तुतकर्ता खड्क लामा मोक्तान हुन् । चलचित्रमा रामेश्वर हुमागाईको छायांकन, विकास चौधरीको संगीत, शिभम् अधिकारीको कथा, अजय स्याङतानको कोरियोग्राफी, तारा थापा ‘किम्भे’को सम्पादन र राजु किराँतीको द्वन्द्व छ ।