दशैंको अवसरमा गत असोज २१ बाट प्रदर्शनमा आएको निर्देशक दिपेन्द्र लामाको लेखन तथा निर्देशनमा निर्माण भएको चलचित्र ‘२ नम्बरी’ शुक्रवारबाट तेस्रो हप्तामा प्रदर्शन थालनी गरेको छ । हलमा सफलतापूर्वक प्रदर्शन भइरहेको चलचित्रले दोस्रो सप्ताहन्तसम्म ६ करोड रुपैयाँ ग्रसभन्दा बढी कमाएको छ ।

बक्सअफिसमा धमाका मचाएको ‘२ नम्बरी’लाई निर्माताले छायांकन भएको गाउँमा प्रोजेक्टरमार्फत् देखाएका छन् । चलचित्रको सम्पूर्ण कास्कीको छायांकन ल्वाङ गाउँमा भएको थियो । गाउँमा सुविधा नभएकाले चलचित्र हेर्न नपाएका स्थानीयलाई निर्माण टिमले बिहीवार चलचित्र देखाएको हो । उक्त चलचित्र हेर्न ल्वाङ गाउँका २ सयभन्दा बढी स्थानीयहरु सहभागी भएका थिए ।

चलचित्र ‘दुई नम्बरी’ सफल हुनुमा कास्कीको ल्वाङ गाउँका स्थानीय वासिन्दाहरुले छायांकनका क्रममा देखाउनुभएको सद्भाव र सहयोगको पनि ठूलो भूमिका रहेको त्यसैले उहाँहरुको सम्मानस्वरुप हामीले ल्वाङ गाउँमै पुगेर स्थानीय वासिन्दामाझ चलचित्र प्रदर्शन गरेको प्रस्तुतकर्ता किरण नेपालीले बताए ।

चलचित्रमा दयाहाङ राई, सौगात मल्ल, उगेन छोदेन (भुटानी अभिनेत्री), उपासना सिंह ठकुरी र बुद्धि तामाङको मुख्य भूमिका रहेको छ । चलचित्रमा दयाहाङ र उगेन तथा सौगात र उपासनाको जोडी बाँधिएको छ । चलचित्रले पहिलो सप्ताहमा मुनाफा कमाइसकेकोले निर्माण टिमले प्राविधिकहरुलाई बोनस बाँड्ने निर्णय पनि गरेको छ । बोनस रकम कति दिने भन्नेबारेमा केही फाइनल भएको छैन ।

एउटा सुन्दर गाउँका २ जना साथी, उनीहरुको मित्रता र दुश्मनीको कथा भन्ने चलचित्र ‘२ नम्बरी’ले समाजमा हुने गरेका २ नम्बरी कामलाई पनि उठान गरेको छ । रेड बर्ड प्रोडक्शन र आरआर फिल्म प्रोडक्शनको ब्यानरमा निर्माण भएको चलचित्रमा कार्यकारी निर्माताको रुपमा किरण नेपाली छन् । चलचित्रमा गण्डकी प्रदेशका युवा तथा खेलकुदमन्त्री राजीव गुरुङ (दीपक मनाङे) र अमलादेवी राईको लगानी छ । भने, कार्यकारी निर्माता सरोज नेपाली हुन् । चलचित्रमा सुशन प्रजापतिको छायांकन, रामजी लामिछानेको कोरियोग्राफी रहेको छ ।