प्रदर्शन भएको १३ वर्षपछि अर्थात् वि.सं २०६४ सालको चैत्र अन्तिममा प्रदर्शनमा आएको सुपरहिट चलचित्र ‘पर्खि बसें’ को दोस्रो सिरिज निर्माण हुने पक्का भएसंगै चलचित्रमा को-को कलाकार रहने भन्ने विषयमा चर्चा सुरु भएको छ । ‘लभ डायरिज’ निर्देशक सौरभ चौधरीले निर्देशन गर्ने ‘पर्खि बसें २’ मा अभिनेत्रीको रुपमा पुजा शर्मा हुने सम्भावना रहेको छ ।
चलचित्रको पात्र अनुसार पुजासंग क्यारेक्टरको बारेमा छलफल गरिएको निर्देशक सौरभले बताए । नायिका पुजाले पनि आफूलाई अफर आएको स्विकार गरिन्। अभिनेत्री पूजा शर्मा फिचर्ड चलचित्र ‘म यस्तो गीत गाउँछु २’ आगामी फागुन २३ गतेबाट प्रदर्शनमा आउने छ । चलचित्रमा कथा पनि निर्देशक चौधरीकै रहनेछ । पहिलो सिरिज झैँ दोस्रोमा पनि सांगीतिक प्रेम कथा देखाइने निर्देशक सौरभले बताए ।
गोपीकृष्ण मुभिजले हिमालयन मुभी स्टुडियोसँगको सहकार्यमा ‘पर्खि बसें २’ निर्माण गर्न लागेको हो। चलचित्रमा निकिता पौडेल र बिनोद सापकोटा निर्माता रहनेछन् भने प्रदीप दाहाल र तिर्थ प्रसाद पौडेल सह निर्माताको रुपमा रहनेछन् । चलचित्रलाई अल नेपाल वितरणको जिम्मा रीच इन्टरटेनमेन्टले पाएको छ ।
गोपीकृष्ण मुभिजले निर्माण गर्ने भनिएको अभिनेता सौगात मल्ल र अभिनेत्री श्रृष्टि श्रेष्ठ स्टारर ‘माइकल अधिकारी’ आउँदो माघबाट फ्लोरमा जादैछ । त्यसपछि यो टिमको ‘पर्खि बसें २’ फ्लोरमा जाने निर्णय रहेको छ । चलचित्रको रिलिज २०७७ सालमा हुनेछ ।
अभिनेता द्वय राजबल्लभ कोइराला र निखिल उप्रेतीसँगै अभिनेत्री युना उप्रेतीको प्रमुख भूमिका रहेको ‘पर्खि बसें’ लाई दीपक श्रेष्ठले निर्देशन गरेका थिए । चलचित्रमा पुराना कलाकार दोहोरिने सम्भावना निकै कम छ । चलचित्रमा को-को कलाकार रहने भन्ने विषयमा चर्चा भएपनि चलचित्रको कास्ट एण्ड क्रियू एक औपचारिक कार्यक्रमको आयोजना गर्दै सार्वजनिक गर्ने तयारीमा टिम रहेको छ ।
