आगामी मंसिर ९ गतेबाट प्रदर्शनमा आउने तयारीमा रहेको चलचित्र ‘मिलन’ मा समावेश आइटम गीत सार्वजनिक गरिएको छ । ‘अलि अलि पिएपछि’ बोलकोगीतमा बबिना किराती र कृष्ण केसीको स्वर छ । गीतमा टेक पौरखी राईको शब्द तथा संगीत रहेको छ।
गीतको भिडियोमा सलोन बस्नेत र कुशल शाह ठकुरीसँगै अभिनेत्री शिल्पा थापाको नृत्य देख्न सकिन्छ । भिडियोमा कविराज गहतराजको कोरियोग्राफी छ । टेक पौरखी राई निर्देशित चलचित्र त्रिकोणात्मक प्रेमकथामा निर्माण भएको हो । अभिनेता कुशल शाह ठकुरी र अभिनेत्री शिल्पा थापाले यसै चलचित्रबाट डेब्यु गरेका हुन् । चलचित्रमा कुशल, सलोन र शिल्पासँगै शिशिर बांग्देल, सुमिन गुरुङ, जानुका पौडेल, रेजिना मगर, डेनियल खड्का, करन थापा मगर लगायतका कलाकारको अभिनय छ ।
कविराज गहतराजको कोरियोग्राफी, कुमार महर्जनको द्वन्द्व रहेको चलचित्र काठमाडौं र कालिन्चोकमा छायांकन भएको हो । प्रविन थापा निर्माता रहेको चलचित्रमा राहुल राईको छायांकन र तारा थापा किम्बे सम्पादन छ ।
