हास्यकलाकार शिवहरी पौडेलले निर्देशनमा डेब्यू गरेको कमेडी चलचित्र‘लक्का जवान’ को पहिलो गीत सार्वजनिक भएको छ ।‘मन त मेरो लक्का जवान’ बोलको शिर्ष गीतमा बाबुल गिरीको संगीत, डिपी खनालको शब्द छ भने स्वर संगीतकार बाबुलसँगै मिना निरौलाको रहेको छ। गीतको भिडियोमा कविराज गहतराजको कोरियोग्राफी रहेको छ ।
बुधवार राजधानीमा एक कार्यक्रमका बीच सार्वजनिक गरिएको गीतको भिडियोमा चलचित्रका सम्पूर्ण कलाकारलाई स्थान दिइएको छ । किरण केसी, शिवहरी पौडेल, राजाराम पौडेल, दीलिप रायमाझी, प्रियंका कार्की, वर्षा सिवाकोटी, सलोन बस्नेत, सुशील पोखरेल, सरोज खनाल, अञ्जु महर्जनलगायतले गीतमा ठुम्का लगाएका छन् । गीतको अडियो र भिडियो दुवै निकै राम्रो छ । गीतको छायांकन पनौतीको सुन्दर धार्मिक स्थलमा गरिएको छ ।
ध्रुवदत्त र अनुसुयषा श्रेष्ठ ओन्ताको प्रस्तुतीमा किरण केसी, दीलिप रायमाझी र शिवहरि पौडेल कार्यकारी निर्माताका रहेको चलचित्र ‘लक्का जवान’ को सह-निर्मातामा सुशील अर्याल, राजाराम पौडेल, राज केसी, सुरेन्द्र केसी, दीपेन्द्र खनियालगायत छन् । ‘आमा बंगलामुखी फिल्म प्रोडक्सन’ को ब्यानरमा बनेको ‘लक्का जवान’ ले केही पाका उमेरका मानिसहरुको कथा भन्ने बताइएको छ । चलचित्रमा अनुसुयषा श्रेष्ठ ओन्ता, सुरेन्द्र केसी, जयनन्द लामा, सविता गुरुङ, यमन श्रेष्ठ, विमला गिरीलगायतका कलाकारहरुको पनि अभिनय रहेको छ ।
चलचित्रमा बरिष्ठ हास्यकलाकार मदनकृष्ण श्रेष्ठ अथिती भूमिकामा छन् । चलचित्रको कथा, पटकथा तथा संवाद शिवहरी स्वयंको हो । चैत २१ गतेलाई प्रदर्शन मिति घोषणा गरेको ‘लक्का जवान’ मा सामाजिक कथावस्तुलाई कमेडी शैलीमा प्रस्तुत गरिएको निर्देशक शिवहरी बताउँछन् ।
लामो समय ‘जिरे खुर्र्सानी’ मा अभिनय गरेका उनले पहिलो पटक निर्देशन गरेको चलचित्र कस्तो होला भन्ने धेरैलाई कौतुहलता छ ।
