चलचित्र ‘पोई पर्यो काले’ र ‘२ नम्बरी’ फेम्ड निर्माता किरण नेपालीले निर्माण गर्ने नयाँ चलचित्र ‘हात्तीछाप’मा अभिनेता दयाहाङ राई अनुबन्धित भएका छन् । दयाहाङ र निर्माता किरण नेपालीबीच चलचित्र ‘दुई नम्बरी’ पछि टिमअप हुन लागेको हो । बिहीवार निर्माता नेपाली र दयाहाङबीच सम्झौता पत्र आदान प्रदान भएको थियो। चलचित्रका लागि अन्य कलाकारको छनौट भने हुन बाँकी छ ।
चलचित्रको कथा, पटकथा तथा संवाद सफल लेखक प्रदीप भारद्धाजले लेखेका हुन् । चलचित्रलाई सिमोस सुनवारले निर्देशन गर्दैछन् । ‘हात्तीछाप’लाई सस्पेन्स, थ्रिलर र कमेडी जनरामा निर्माण गरिनेछ । यसै वर्षको चैतबाट चलचित्रको छायांकन सुरु गर्ने तयारी निर्माण टिमको रहेको छ ।
‘पोई पर्यो काले’को सिक्वेल ‘पोई पर्यो बुढो’ बनाउने तयारी गरेका निर्माता नेपालीले यो चलचित्रको कामलाई हालको लागि पोष्टपोन्ड गरेका छन् । प्रदीपको कथा मन परेपछि उनी यो चलचित्र भन्दा अगाडि नयाँ चलचित्र ‘हात्तीछाप’ बनाउने निर्णय गरेका हुन्।
