यही शुक्रबारदेखि प्रदर्शन हुन लागेको प्रतिक्षित चलचित्र ‘छक्कापञ्जा ४’ले प्रचार गीत ल्याएको छ । केदारप्रसाद घिमिरे ‘माग्ने बुढाको’ स्वरमा रहेको गीतमा चलचित्रका शीर्ष सबै कलाकारलाई व्यंग्य गरिएको छ । माग्ने बुढाको आफ्नै कम्पोजमा तयार भएको गीतको भिडियोमा कार्यकारी निर्माता तथा अभिनेता निर्मल शर्मालाई पनि फिचर्ड गरिएको छ ।
दीपाश्रीदेखि दीपकराज गिरीसम्म, अभिनेत्रीहरु बेनिशा हमाल, मलिना जोशी र स्वस्तिमा खड्कासाथै तीतो सत्यमा बाल कलाकारको रुपमा चर्चामा आएका राज आचार्यदेखि बुद्धि तामाङसम्मलाई पनि गीतमा कटाक्ष गरिएको छ ।
हेमराज बीसी निर्देशित कमेडी तथा सामाजिक ड्रामा चलचित्रमा दीपक राज गिरि, दीपाश्री निरौला, केदार घिमिरे, राज आचार्य, मलिना जोशी, बेनिशा हमाललगायतको अभिनय छ । सामाजिक र राजनीतिक कथावस्तुमा बनेको चलचित्र आमा सरस्वती मुभिज र आईएमईको ब्यानरमा निर्माण भएको हो ।
