कोरियोग्राफर तथा निर्देशक रेनाशा वान्तवा राई निर्देशित चलचित्र ‘ज्याकी: आइएम ट्वान्टी वान’को टिजर सार्वजनिक गरिएको छ । टिजरमा ज्याकी पात्र अर्थात् धीरजले हिपहप डान्समा करिअर बनाउने सपना देखेको एक ‘एमेच्योर्ड डान्सर’को भूमिका निर्वाह गरेका छन् । साथै टिजरमा डान्सर बन्ने सपनामा परिवारको ब्रिटिस आर्मी बनाउने सपनाले ल्याउने उतार-चढाव देखाइएको छ ।
चलचित्रमा धीरज मगरको साथमा जसिता गुरुङ, अरुण क्षेत्री, प्रेम सुब्बा, लुनिभा तुलाधर, पल्पसा डंगोल, राजु भुजु, सुजता राईलगायतका कलाकारको अभिनय छ । चलचित्रलाई नेपालको पहिलो डान्स चलचित्र भनिएको छ ।
सुशान्त प्रजापतिको छायांकन, निमेश श्रेष्ठको सम्पादन, रेनशा राई राना र सोमनाथ खनालको संवाद छ । चलचित्रमा रोहित शाक्य र कालीप्रसाद बाँस्कोटाको संगीत रहेको छ । प्रभु शमशेर जबरा र प्रज्ज्वल शमशेर जबराले निर्माण गरेको सिनेमा बैशाख २१ मा रिलिज हुने सम्भावना छ । तर निर्माण पक्षले आधिकारिक मिति घोषणा गरिसकेको छैन ।
