नयाँ वर्षको अवसर पारेर आगामी बैशाख १ गतेबाट प्रदर्शन हुन लागेको चलचित्र ‘नाइँ नभन्नु ल ६’को नयाँ गीत ‘तलाउमा ढुंगा नहान’ सार्वजनिक भएको छ । मंगलबार सार्वजनिक भएको गीतमा वसन्त सापकोटाको संगीत र राजनराज सिवाकोटी र मेलिना राईको स्वर समावेश छ । यो डान्सिङ ट्रयाकमा चलचित्रका शीर्ष कलाकारहरु आँचल शर्मा र आशिर्वाद क्षेत्री फिचर्ड छन् । गीतमा रोमान्टिक भावमा प्रस्तुत उनीहरुको केमेस्ट्री सुहाएको छ भने दुवैको नृत्य शैली निकै आकर्षक देखिन्छ ।
विकास आचार्य निर्देशित यो चलचित्र बाल र युवापुस्ताको प्रेमकथामा आधारित रहेको छ र यो चलचित्र नाइँ नभन्नू लको छैटौं श्रृंखला हो । ‘नाईं नभन्नू ल ६’मा आँचल र आर्शिवादसँगै प्रियंका कार्की, केकी अधिकारी, सरोज खनाल, योगिशा खत्री, अर्थव उप्रेती, एभलिना खड्कालगायतको अभिनय छ ।
अथर्व अभिनेता निखिल उप्रेती र अभिनेत्री सञ्चिता लुईंटेलका छोरा हुन् । चलचित्रमा उनी नव-अभिनेता आर्शिवाद क्षेत्रीको बाल्यकालको भूमिकामा देखिनेछन् । एभलिना भने टिकटकमा निकै हिट छिन् । आख्यान फिल्म्सको ब्यानरमा सिविन दाहाल र सञ्जय न्यौपाने निर्माता रहेको चलचित्रमा आशीर्वाद र आँचलको जोडी बाँधिएको छ ।
त्यस्तै,‘नाईँ नभन्नू ल’को दोस्रो श्रृंखलादेखि आवद्ध कलाकार अनुभव रेग्मी छैटौं सिरिजमा केमियो भूमिका मात्र रहनेछ । विकासराज आचार्य र सामिप्यराज तिमल्सिनाको कथा रहेको यस चलचित्रमा पुरुषोत्तम प्रधानको छायांकन छ ।
