वर्षमा एउटा मात्र चलचित्र लिएर आउने सुदर्शन थापा यस वर्ष चलचित्र ‘म यस्तो गीत गाउँछु’ को सिक्वेल दर्शकमाझ पस्कँदैछन् । थापाको निर्माण तथा निर्देशनमा तयार भएको चलचित्र ‘म यस्तो गीत गाउँछु २’को अफिसियल पोस्टर सार्वजनिक गरिएको छ । केही दिन अघि सार्वजनिक भएको चलचित्रको ट्रेलरलाई दर्शकले रुचाइरहेका छन् । चलचित्रको सार्वजनिक पोस्टरमा पल र पूजालाई निकै रोमान्टिक मुडमा प्रस्तुत गरिएको छ । दुवैको केमिस्ट्री निकै सुहाएको देखिन्छ ।
पल र पूजाको जोडीलाई दर्शकले ‘म यस्तो गीत गाउँछु’मा रुचाइसकेका छन् । सांगीतिक प्रेम कथामा तयार भएको चलचित्र ‘म यस्तो गीत गाउँछु २’ मा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारहरुको अभिनय छ ।
सुदर्शन थापा र पूजा शर्मा निर्माता रहेको चलचित्रमा जन्मजय साम्पाङ राई सह–निर्माताको रुपमा छन् । रीच इन्टरटेन्मेन्ट र जीजीए ग्रुपले काठमाण्डौ र एफडी कम्पनीले काठमाण्डौ बाहिर चलचित्रको वितरण गर्नेछ । यो चलचित्रमा सुरज आचार्य र सुदिप ढकाल निर्माण नियन्त्रकको रुपमा छन्। शिवम अधिकारी र दिनेश न्यौपानेले चलचिको कथा लेखेका हुन् ।
बनिष शाह र मिलन श्रेष्ठको सम्पादन रहेको चलचित्र सौरभ लामाले खिचेका हुन् । चलचित्रमा समावेश पाँचवटा गीतमा संगीतकार अर्जुन पोखरेलको संगीत छ । यो चलचित्र फागुन ३०मा नेपालभर प्रदर्शन हुँदैछ ।
