रोहित शेट्टी निर्देशित बहुप्रतिक्षीत बलिउड चलचित्र ‘सूर्यवंशी’ को रिलिज पोस्टपोन्ड भएको छ । संसारभर महामारीको रुपमा फैलिएको कोरोना भाइरसका कारण चलचित्रको प्रदर्शन स्थगित गर्ने निर्माण टिमले निर्णय लिएको हो । ‘सूर्यवंशी’ मार्च २४ मा प्रदर्शनमा आउने तयारीमा थियो ।
चलचित्र निर्माण कम्पनीले एक विज्ञप्ति जारी गर्दै कोरोनाको कारण पहिलो प्राथमिकता जनताको स्वास्थ्य भएको भन्दै चलचित्रको प्रदर्शन मिति पछि सारेको हो । अभिनेता अक्षय कुमारले पनि जनताको स्वास्थ्य पहिलो प्राथमिकता भएको भन्दै ट्विट गरेका छन् । चलचित्रको ट्रेलर सार्वजनिक भैसकेको छ भने गीत रिलिज कार्यक्रम पनि स्थगित भैसकेको छ । एक्सन प्रधान चलचित्रको ट्रेलरले दर्शकबाट राम्रो प्रतिक्रिया बटुलेको छ ।

‘सूर्यवंशी’ रोहित शेट्टीको कप सिरिजको चौथो चलचित्र हो । यसमा अक्षय कुमार र कटरीना कैफ प्रमुख भूमिकामा छन् । यो चलचित्रमा ‘सिंघम’ उर्फ अजय देवगन र ‘सिम्बा’ उर्फ रणवीर सिंह पनि देखिँदैछन् ।