आगामी माघ २५ गतेदेखि प्रदर्शनमा आउने हरर फ्यामिली ड्रामा चलचित्र ‘ममी’ को ट्रेलर रिलिज गरिएको छ। मुख्य कलाकार प्रियांका कार्की र सुलक्षण भारतीको संवादसँगै विभिन्न डर लाग्दा घटना, भूतिया आकृति, र अलौकिक पात्रहरूको झल्को १ मिनेट ५७ सेकेन्ड लामो ट्रेलरमा समेटिएको छ। ट्रेलरले चलचित्रको कथावस्तु र डरको माहोललाई प्रस्तुत गर्दै दर्शकमा कौतुहलता पैदा गर्ने संकेत गरेको छ।
चलचित्रमा प्रियांका र सुलक्षणसँगै दीया मास्के, समीप निरौला, घनश्याम जोशी, आयुषी ढकाल, जेभिस श्रेष्ठ, गुराँस ढकाल, र गीत विष्टको अभिनय रहेको छ। सो ट्वान्टी फाइभको प्रस्तुतिमा निर्माण भएको यस चलचित्रको लेखन समर निरौला र पूर्णिमा जोशीले गरेका हुन्। निर्देशन समर निरौलाले गरेका छन्, जसका लागि यो डेब्यू निर्देशन हो। चलचित्रका निर्माता लोक राज जोशी र पूर्णिमा जोशी हुन् भने कार्यकारी निर्मातामा सुमन कोइराला छन्।
चलचित्रको छायांकन निशाल पौडेल र शरद महतोले संयुक्त रूपमा गरेका हुन् भने सम्पादन सुरेन महर्जनको रहेको छ। पाश्र्व ध्वनीमा रोहित शाक्य, साउन्ड डिजाइनमा श्रवल आरपी, द्धन्द्व निर्देशन एनभी महर्जन, र संगीतकार एसडी योगी रहेका छन्। चलचित्रलाई काठमाडौं उपत्यकामा काफिया फिल्म्स र मोफसलमा कुवेर सिने डिस्ट्रीब्युसनले वितरण गर्दैछन्।
