बलिउड अभिनेता सुशान्त सिंह राजपुतको अन्तिम चलचित्र ‘दिल बेचारा’ शुक्रवार (आज) रिलिज हुँदै छ । गत महिना मुम्बईको बान्द्रा स्थित आफ्नो अपार्टमेन्टमा आत्महत्या गरेका सुशान्त सिंह राजपुतको अन्तिम चलचित्र बन्यो ‘दिल बेचारा’ । चलचित्र बेलुका ७:३० बजे अनलाइनमा रिलिज गरिँदै छ । चलचित्र भारत, अमेरिका, युके र क्यानडाका डिज्नी प्लस हटस्टारका सब्सक्राइबर र ननसब्सक्राइबर दुवैका लागि एकैसाथ प्रिमियर हुँदै छ । सुशान्तलाई समर्पण गर्दै चलचित्र सबैका लागि निःशुल्क देखाउने निर्णय निर्माण पक्षले लिएको हो । मुकेश छाबडाको निर्देशनमा बनेको चलचित्र ‘दिल बेचारा’ लकडाउनका कारण रिलिज हुन पाएको थिएन । चलचित्रमा सुशान्त र संजना सांघीको मुख्य भूमिका रहेको छ भने सैफ अलि खानको पनि महत्त्वपूर्ण भूमिका रहेको छ । अभिनेत्री सन्जना सांघीले यसै चलचित्रबाट बलिउडमा डेब्यु गर्न लागेकी हुन् ।
चलचित्र ‘दिल बेचारा’ सन् २०१४ मा प्रदर्शन भएको सफल हलिउड चलचित्र ‘द फल्ट इन आवर स्टार्स’ को आधिकारिक रिमेकमा निर्माण भएको चलचित्र हो । सुशान्तको अन्तिम चलचित्र भएका कारण ‘दिल बेचारा’ हेर्न दर्शकहरु निकै आतुर छन् । अब दर्शकले सुशान्तको अभिनय रहेको चलचित्र यो भन्दा पछि हेर्न पाउने छैनन् ।
