चलचित्र ‘होस्टेल’ बाट अभिनेत्रीको रुपमा डेब्यू गरेकी अभिनेत्री तथा मोडल प्रकृति श्रेष्ठले आफुलाई बलिउडमा पनि काम गर्ने इच्छा रहेको बताएकी छन् । आइतवार सामाजिक संजाल इन्स्टाग्राममा एक
प्रशंसकले बलिउडमा काम गर्ने चाहनाबारे सोधेको प्रश्नमा उनले भनेकी छन्, ‘इच्छा छ । तर मलाई थाहा छ कि यो मेरो सपना मात्र रहनेछ ।’ एक प्रशंसकले बलिउड चलचित्र ‘देवदास’ मा पारो र चन्द्रमुखीमध्ये एउटा भूमिका निभाउने अवसर पाए कुन छान्नुहुन्छ ? भनेर सोधेको प्रश्नमा प्रकृतिले ‘पारो’ भनेकी छन् । केहि समय अघिमात्र प्रकृतिले इन्स्टाग्राममा एक प्रशंसकले ‘तपाईंले कहिल्यै यौन उत्पीडनको सामना गर्नुभएको छ ?’ भनेर सोधेको प्रश्नको उत्तर दिदै आफुले इन्डस्ट्रीमा काम गर्न सुरु गर्दाको समयमा यौन उत्पीडनको सामना गर्नुपरेको कुरा खुलासा गरेकी थिइन् ।
६ वर्ष पछि पर्दामा फेरी देखिन लागेकी उनले निषेधाज्ञाभन्दा अगाडि चलचित्र बिहे पासको छायांकन पूरा गरेकी हुन् जसमा उनको जोडी अभिनेता दयाहाङ राईसँग बाँधिएको छ । ‘बिहे पास’ को छायांकन सकेपछि उनले पल शाहसँग ‘को होला त्यो ?’ गीतको फिमेल भर्सनमा पनि अभिनय गरेकी थिइन् । चलचित्र र म्युजीक भिडियोको छायांकन सकेर प्रकृति अष्ट्रेलिया गइसकेकी छन् । विवाह गरेपछि उनी श्रीमानसँग अष्ट्रेलियामा बस्दै आएकी छन् ।
