चलचित्र ‘डाँडाको वरपीपल’ को तेस्रो गीत ‘तिमी साथमा हुँदा’ सार्वजनिक भएको छ । सुगम पोखरेल र जिना रसाइलीको स्वर रहेको गीतमा नवराज गिरीको शब्द, एलिस कार्कीको संगीत रहेको छ । गीतको भिडियोमा सलोन बस्नेत र रुविना थापा रोमान्टिक अवतारमा प्रस्तुत भएका छन् । र दुवैको केमेस्ट्री निकै सुहाएको छ रोमान्टिक थिमको गीतलाई रामजी लामिछानेले कोरियोग्राफ गरेका हुन् ।
यही असोज २६ गतेबाट प्रदर्शनमा आउन लागेको यो चलचित्रको चित्लाङ र काठमाडौंमा छायांकन भएको हो । यस चलचित्रमा अस्मिता जुरेली, हिउँवाला गौतम, उतम केसी, संगम भण्डारी, प्रभात पल, अस्मी थापा, प्रदीप गिरी, सुशान्तकुमार श्रेष्ठ, ज्ञानकुमार कट्टेल लगायतका कलाकारको पनि अभिनय छ ।
बुढासुब्बा ओर्जिनलको प्रस्तुतिमा निर्माण भएको यस मल्टिस्टारर चलचित्रमा नवराज गिरीको लगानी, रामकाजी घिमिरेको लेखन, सुशान्त प्रजापतिको छायांकन, रोशन श्रेष्ठको द्वन्द्व निर्देशन र मित्रदेव गुरुङको सम्पादन छ ।
एक समयका सफल निर्देशक शोभित बस्नेत निर्देशित यो चलचित्रमा शिव श्रेष्ठ र भुवन केसीले १६ वर्षपछि एकसाथ चलचित्रमा काम गरेका हुन् । उनीहरुले पछिल्लो पटक २००५ मा रिलिज भएको शोभित बस्नेत निर्देशित सुपरहिट चलचित्र ‘राजु राजा राम’ मा सँगै काम गरेका थिए । त्यस्तै, शिव श्रेष्ठ र गौरी मल्लले ‘धर्मसंकट’ रिलिजको २० वर्षपछि एकसाथ काम गरेका हुन् ।
चलचित्र संघको निर्णय अनुसार आज (घटस्थापना) बाट एकाधबाहेक देशभरका सिनेमा हलहरु खुलेका छन् । मल्टीप्लेक्स र सिंगल थिएटरहरुमा आजबाट हलिउड चलचित्र ‘फास्ट एन्ड फ्यूरियस ९’ प्रदर्शनमा आएको छ । कोरोनाका कारण यो चलचित्र नेपालमा प्रदर्शन हुन सकेको थिएन ।
हल चलाउनका लागि प्रदर्शकले विदेशी चलचित्रकै सहारा लिनुपर्ने अवस्था आएको छ । ४ महिनादेखि बन्द हलमा पहिलो दिन नै हलिउड चलचित्र लागेको हो । गत वर्ष दशैंमा कोरोनाका कारण सिनेमा हल सुनसान भए । यस वर्षको दशैंमा पनि नयाँ चलचित्र चलाउन कुनै निर्माता सोचमा पुगेनन् । गतबर्षदेखि नै यो बर्षको दशैंमा चलचित्र रिलिज गर्ने सोेच बोकेर बसेका निर्माता समेत पछि परे । शोभित बस्नेतको ‘डाँडाको वर पीपल’ बाहेक अरु निर्माता दशैंमा चलचित्र रिलिज गर्न अघि सरेनन् ।
गीत हेर्नुहोस् :-
